Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Den xciiij. Psalm.

1. Een ghebet tegen der Kercken vyanden, die hy swaerlicken beschuldicht, dat sy met harer leere anders niet, dan de vroomen moorden ende dooden, 8. ende dreyghet hen Gods (dien sulcke lasteren niet onbewist zijn) strenge Gerichte, 12. Ende troostet de Kercke, dat sy in sodanen cruyce niet verlaten, maer behouden sal worden, ende de vyanden (20. dier stoel, det is, leere ende leuen, God nemmermeer gheuallen mach) omkomen.

A.1

HEere God, ^a diens de wrake is, God, diens de wrake is, ^b verschijnt.

a Deut. 32.d.35. Psalm. 7.a.9. Rom. 12.b.19.

b Dat is, Breect hieruoor, laet dy sien.

2

Verheft dy du Richter der wereldt, vergheldt den hooueerdighen wat sy verdienen.

3

^c Heere, hoe langhe sullen de Godlooosen, hoe langhe sullen de Godloosen ^d pralen?

c Psalm. 73.a.4.

d Dat is, Daer henen varen met woorden, als een heere oft tyranne, dien men vreesen moet, ende wat hy seyt oft wil.

4

Ende so spijtelick spreken, ende alle quaetdoenders hen also roemen?

5

Heere, sy slaen ^e in stucken dijn volc, ende plaghen dijn Erue.

e Of, te morsel.

6

Weduwen ende vreemdelinghen verworgen sy, ende dooden de weesen.

7

^f Ende segghen, De Heere siet het niet, ende de God Iacobs achtet dies niet.

f Psalm. 73.b.11.

8

Mercket doch ghy sotten onder den volcke, ende ghy dwasen, wanneer willet ghy kloeck worden?

9

Die de oore gheplantet heeft, soude die niet hooren? die de ooghe ghemaeckt heeft, soude die niet sien?

B.10

^g Die de Heydenen tuchtighet, soude die niet straffen? die den menschen leert wat sy weten.

g Gene. 7.c.21. ende 19.c.24. Exod. 14.c.27.

11

^h Doch de Heere weet de ghedachten der menschen, dat sy ijdel zijn.

h 1.Corint. 3.c.20.

12

ⁱ Wel dien, dien du Heere tuchtigest, ende leerest hem door dyne Wet.

i 1.Corint. 11.d.32.

13

Dat hy gedult hebbe wanneer het qualic gaet, tot dat den Godloosen de kuyle bereydet werde.

14

Want de Heere sal zijn volck niet verstooten, noch zijn Erue verlaten.

15

^k† Want recht moet doch recht blijuen, ende dien sullen alle vrome herten toeuallen.

k† An. Maer sal het gherichte weder na der gherechticheyt richten.

16

Wie staet by my, teghen de boosachtighen? wie treedt tot my, teghen de quaetdoenders?

17

So de Heere my niet holpe, so laghe mijn ziele schier in der ^l stilheyt.

l Dat is, In der Helle, daer het stille is, ende gantsch wt.

18

Ick sprac, Mynen voet heeft ghestruyckelt, doch dyne ghenade Heere, hieldt my.

19

^m Ick hadde vele bekummernissen in myner herten, doch dyne troostinge verheuchden mijn ziele.

m 2.Corint. 1.a.5.

C.20

Du werst nemmermeer eens met den ⁿ schadelicken stoele, ^o† die de Wet qualick bediedet.

n Dat is, Daermen schadelicke dingen ende verderffenisse der zielen leert.

o† An. dat du kommer voor een Wet dichtest.

21

Sy ^p† rusten hen tegen de ziele des rechtueerdighen, ende verdoemen onschuldich bloedt.

p† And. rotten.

22

Doch de Heere is myne beschuttinghe, mijn God is den ^q† troost myner toeuersicht.

q† And. rotze.

23

Ende hy sal hen haer onrecht verghelden, ende salse om harer boosheyt wille verdelghen, de Heere onse God salse verdelghen.