Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Den xxviij. Psalm.

1. Desen Psalm schijnt gheschreuen te zijn van Dauid, doe hy in perijckel was om des Koninckrijcx wille, daer hy van God door Samuel, toe gheroepen was: want hy bidt om bescherminghe voor sulcke vyanden: die allesins met list omghinghen, ende niets opentlick aen en richteden: gelijck als Saul inden beghinne dede.

A.1

Eenen Psalm Dauids. VVanneer ick roepe tot dy, Heere mijn ^a† Hordt, so en swijcht my niet: op dat niet, so du swijghest, ick ghelijck worde, dien, die in de Helle varen.

a† And. sterckte,

2

Hoort de stemme mijns smeeckens, wanneer ick tot dy schreye, wanneer ick myne handen opheffe, tot dynen heylighen Choor.

3

Treckt my niet henen onder den Godloosen, ende onder den quaetdoenders, ^b die vriendelick spreken met haren naesten, ende hebben het boose int herte.

b Ierem. 9.a.8.

[fol. 182v]

4

^c Gheeft hen na harer daet, ende na haren boosen wesen: gheeft hen na de wercken harer handen, betaelt hen wat sy verdient hebben.

c Iob. 34.b.11. Ierem. 17.b.10. Roma. 2.a.6. Psalm. 62.b.13.

5

Want sy en willen niet achten op het doen des Heeren, noch op de wercken syner handen: daerom sal hyse breken, ende niet bouwen.

6

Gheloeft zy de Heere, want hy heeft verhoort de stemme mijns smeeckens.

7

^d De Heere is mijn sterckte ende mijnen schilt, op hem hoept mijn herte, ende my is geholpen: ende mijn herte is vrolick, ende ick wil hem dancken met mynen liede.

d Deute. 8.b.18.

8

De Heere is haer sterckte: hy is de stercke, die synen Ghesalfden helpt.

9

Helpt dynen volcke, ende seghent dijn ^e erue, ende weydtse ende verhoochtse eewichlick.

e Deute. 32.a.9.