Chiromantie

Dits tcapitel vanden berghe die steet naest den cleinen vinger

¶ Nu eist te segghene vanden berghe die steet naest den cleinen vinger ¶ Eist dat twe linien staen op desen berch streckende ten wortele van desen vinghere die effene staen versceeden van goeder varwe. dit .b. dat een mensche es subtijl ende heeft appetijt van consten. Maer

[p. 201]

hi es vele sprekende. ende daer bi mint hi sciencien daer men vele in sprect als logike ende rethorike ende sophisticacie. Want hi begheert meer te scinen connen van buten danne de cunst van binnen. Ende oec verblijt hi sere in idelre glorie. ende hi roect vele van wiven. ¶ Eist dat dese ij. linien niet effene staen ende niet effene beghinnen also dat dene boven beghint ende dandre beneden. dit .b. contrarie van datter vorseit es. ¶ Eist dat ene cleine subtijl linie spruut uut den wortel vandesen vinghere allene. dit .b. cleine wonden in die lanken. ¶ Ene linie vonden tusschen desen vinghere ende den cleinen vinger die groot es. dit .b. hoecheit van state