Chiromantie

Dits tcapitel vanden berghe vander hant

¶ Na dat gheseit es vanden vieren pricipael linien. Nu es te segghen vanden berghen diere omtrent staen ende ierst vanden berghen der vinghere ¶ Als in den berch vanden iersten vinghere tusschen den beghinsele vander middel linie ende den wortel van index siin vonden vele linien weder kerende ende effene staende ende op dat si niet en siin dorloepen met andren linien over lanc. Dit .be. ghetrouwecheit van vore ghelegchden dinghen ¶ Ende tselve bediet ene lange linie daer vonden die van ghere andre dor slaghen nes Maer als twe linien also comen als hier vorseit es ende daer ene linie dor geet dit bediedt tcontrarie van datter vors. es. Item een cruus vonden in desen vorseiden berch. dat .be. ere. ¶ Item ene .O. vonden in den selven berch .b. rijcheit. ¶ Item ende enen scilt vonden daer oec. dit bediet. edelheit. ¶ Eist oec dat twee linien comen vanden wortele vanden iersten vingere te oversten hoeckewert van den driehoecke. dit .b. ene toe comende siecheit in dien dat si rooet siin. Maer siin si bleec. So essi leden ¶ Item in die vornoemde stat vonden aldus denege (l. danege) figure [teken met een hoefijzervorm]. vel sic [teken zoals het vorige, waarbij de onderhelft van de linkerkant van het hoefijzer ontbreekt] dit .b. siecheit. ¶ Eist oec dat in dende vander tafel linie ene linie dore geet. dit .b. wonden van sinen viant. Eist dat si groet es. So .be. wonden

[p. 200]

in thoeft. Maer essi subtijl. Soe bediedet wonden in de lanken. Ende essi oec groet. So .b. oec wonden in den borsten ¶ Eist dat twee linien beghinnen in dende vander tafel linien ende enden inden wortel van index. dit .be. haesteghe dooet ¶ Eist dat drie cromme linien comen uute den wortel van index. dit .b. wonden in den hals. of in thoeft. ¶ Het segghen eneghe dat ene linie dalende tusschen den iersten vingere. ende den andren vinger ter tafal (l. tafel) linien wert op dat si niet toe ne comt. dit .be. dat een mensche sterven sal vander scite Ende eist dat si scarp es. het .b. toe comende cortsse. Eist oec dat uute dier linien vele linien uut gaen. dit .b. juchtechheit vore sine doet.