Dits tcapitel vander spacie vanden driehoecke.
¶ Als ene linie beghint an de linie vanden levene ende gaet ten suchtren hoecke waert. Dit .b. vreese van viere ofte van watre. Eist dat de vorseide linie gheet ter suchter linie wert. dit es vreese van viere. Maer gheetse ter fondament linien wert. dit .b. vreese van watre van hem of van sinen dinghen ¶ Eist oec dat twee [teken overeenkomend met een liggende acht] bliken binnen den driehoecke. Dit .be. dat de beroeringhe van sire gramscap sal dooden sinen viant. ofte iemen el binnen sire stat ¶ Eist dat men vint roede poente in den driehoec. dit .b. dat een wijf gheen kint mach draghen ¶ Eist oec dat men vint een driehoxkiin in den driehoec ten oversten hoecke wert in een wijf. dit bediet datsi saen sal kint ontfaen
Auteursrechtelijk beschermd