|
| |
| |
| |
Balade.
EEn wonderlijcke saeck, die hier nv is op handen
Daerom stelt wacht en waeck, in alle Christen Landen.
Roomen sal haest vergaen, en haer geheele Rijck
Dit gheeft ons te verstaen, een valsche Here-Tyck
Met Sodoma terstont, ter Hellen moeten sincken,
Dit heeft den Helsen hont, te Amsterdam doen klincken.
In sessendertich jaer, hoort wel nae dit bedien
is dat dit stuck is waer, soo sal het dan gheschien.
Dit is nv soo ghezeyt, van Antechrist voorlooper
Diet volck aldus verleyt, als Helsche zielvercooper
| |
| |
Syn Profecy is vals, O Christen wilt het weten
Hy liecht het in zyn hals, ick salt hem in doen vreten
Ghy valsche Caeyems zaet, wat gaet ghy al bedrijuen,
Door Duyuels loosen raet, gaet ghy het volck verstijuen.
Dit is een Leugen claer, van Plancius practizeert
Daer dese boose schaer, hier nv mee soo braveert.
Alsmen nv wilt weten, waer het gheschreuen staet
Die valsche Propheten, sy en weten dan geenen raet
Hy roept al int ghemeen, dat Roomen sal vergaen
Gommaris volck alleen, die sullen blijuen staen.
Des werelts ronde Cloot, wort haer nv in gegeuen
Die Gommarissen snoot, die worden so verheuen.
Gommaris is verblijt, van dese goede maeren
En heeft in corten tijdt, al zyn volck doen vergaren
Als zy nv zijn seer ras, te Dort by een ghecomen
Sy hebben op dat pas, een blijde maer vernomen.
Plancius Profecy, die houwen sy waerachtich
Hierom sijn sy zeer bly, en wercken nv seer crachtich.
Arminius den Helt, sy hebben hem verslaghen
En willen met gewelt, Godt wt zyn troon nv jagen.
| |
| |
Sy sluyten nv ghewis, hoort wel nae dit vermonden
Dat Godt die oorsaeck is, van al des menschen sonden
Christus des Vaders Soon, hier bouen hooch ghepresen
is met een doorne Croon, seer schandelijc verwesen
En om dry puncten vals, die sy daer deden seggen,
Sy hebben op zyn hals, het zwaere Cruys doen legghen.
Die joden wisten niet, het quaet dat sy daer deden,
Daerom heeft Christus siet, aent Cruys voor haer ghebeden.
Al in zyn lijden swaer, wil dit nv wel bevroen
Vader vergheeft het haer, sy weten niet wat sy doen.
Die joden als verblint, Christus van haer verschouen
Gommaris zyn ghesint, die gaen haer verre te bouen
Al onse sonden groot, van Adams tijdt bedreuen
En van den Duyuel snoot, die schuldt sy Godt nv gheuen
Noyt Heyden was so zodt, of quaet al van manieren
Die wilden haeren Godt, also gaen blasphemieren.
In al haer tegen spoet, oft soo wy moghen marken
| |
| |
Die Goden die zijn goet, recht-veerdich in haer warken.
Dit was altijt haer woort, datmen daer de verhalen
Gommaris die gaet voort, en wilt nv Godt doen dalen
Wat volcht wt dese leer, en al haer vals costuymen
Dat Godt sal daelen neer, den Hemel moeten ruymen
Dat schoone eertsche dal, daer Adams kinders swaruen
Sal hier nv by gheval, aen Gommarissen aruen
Sijn Plancius woorden waer al van die Roomsche Rijcken
Die Werelt die is haer, sy gaen daer dan me strijcken
Sy willen nv met list, wilt dit nv wel versinnen
Is dat haer niet en mist, twee groote Prijsen winnen.
Lucifaer sal seer ras, den Hemel gaen bespringhen
Gommaris op dit pas, die werelt nv bedwinghen.
Soo dit nv wel voort gaet, hier bouen en beneden
So is Godt wt zyn staet, en sy zijn daer in vreden.
Heeft dese Calver steert, dit nv niet wel versonnen,
Die Hemel ende eerdt, soo haest nv heeft gewonnen.
Die nv de sterckste is, die sal het veldt behouwen
| |
| |
Dat is Godt nv ghewis, daer wy ons op betrouwen
Haer valsche Profecy, en al haer helsche droomen,
Al zyn sy nv soo bly, haer tijdt sal oock eens comen
Dat haer sal zijn gevraecht, nae die verdoemde zielen
Die van haer zyn gejaecht, met groot getal nv krielen
Beneden in die brant, die daer zyn in ghebrocht
Sy sullen van haer hant, seer scharp noch zyn gesocht
Haer groote sonden snoot, die gaen sy Godt opleggen
Maer als nv comt die doot, Godt sal haer anders segghen.
Het schijnt wel zyn gedaen, van die Hollansche geusen
Hoe sullen sy noch staen, met groote lange Neusen.
Als Godt sal comen ras, al op een booch gheseten
En sal dan op dat pas, al onse sonden weten.
Al die Godt schelden quaet, autheur van alle sonden,
En die dan in die staet, daer soo sal zyn bevonden
Sy sullen dan seer snel, van Godt daer zijn verwesen
Int afgront vander Hel, daerom wilt nv seer vreesen
Wy bidden v o Godt, laet ons met v in vreden
Als het onsaelich Lodt, sal daelen nae beneden.
Vidit E.S.P.
|
|
Auteursrechtvrij