De C.L. psalmen des conincklijcken propheten Davids

Catechismus:

Op de Voys: Het is dat Heyl ons comen her.

NV laet ons Christen Jonck end Out
Met rechter Aendacht singhen,
Bekennen vry end sonder Fout,
Die Leer voor allen dinghen,

[fol.  Cciiij.v]

 

Die ons van Godt ghegheven is,

 

Ghedeylt in dees Artijckels wijs,

 

Gheheeten Catechismus.

 

 

 

2. Gods wil bethoont ons d'eerste Leer,

 

In Thien Ghebodt beschreven,

 

Godt lieven boven all' dinck meer,

 

Syn Naesten als hem even,

 

Alsoo leert ons Godt leven slecht,

 

End onse Sond' bekennen recht,

 

Wijst ons beyd' Doot end Leven.

 

 

 

3. Daer op volcht der ghenaden Woort

 

En troost den Sondaer weder,

 

Het wijst ons Jesum Christum voort,

 

Ghecruyst is hy hier neder,

 

Daer door betaelt is onse Schult,

 

End ons verworven Godes Huld',

 

Te moghen Eewich Leven.

 

 

 

4. Al haest leert ons de Gheest voortaen

 

Tot Godt den Vader schreyen,

 

End hem wel hert'lijck roepen aen,

 

Dat hy ons wil verleenen

 

Syn trouwe Hulp end' goede Macht

 

Op dat syn Will' word' vollenbracht,

 

By ons ooch hier op Aerden.

 

 

 

5. Die Sacrament end Seghel goet

 

Gheeft ons Christus ten besten,

 

Dat wy ghedoopt in synen Doot,

 

Die Salicheyt bevesten,

 

Gheheelijcx op den duyren Schat,

[fol.  Ccv.r]

 

Dien hy daer met verworven hadt,

 

Om syn Ghenade te Erven.

 

 

 

6. Noch Eten oock en Drincken wy

 

Syn Lijff end Bloet op Aerden,

 

Het maeckt ons Levendich end Nieu,

 

En dat wy stercker werden,

 

Om Sond' en Duyvel teghenstaen,

 

End nimmermeer te Rugghe gaen,

 

Al cost het Lijff end Leven.

 

 

 

7. End want des Vleesches sondig' Aert

 

Die Herten maecket beven,

 

So syn die Sleut'len onghespaert,

 

Die Sonde te vergeven,

 

Wel tseventich mael sevenmael,

 

Dies comen wy nae t'Sondich Dael,

 

Int Eewigh' Leven, Amen.