De C.L. psalmen des conincklijcken propheten Davids

Den Hymnus: Ad Coenam Agni Providi.

Dit machmen singen op Paesschen, ende oock by des Heeren Avontmael.

Op zijn eyghen Voys.

[fol.  Cxcviij.v]

ERASM: ALB.

NU laet ons Christum loven fijn,
En met een ander vrolijck zijn,
Die Tyran is met synen Heer
Verdroncken inden rooden Meer.
2. Wy stonden al in grooter vaer,
Doen hy ons woud' verdelghen gaer,
Doen holp ons Christus onse Heer,
En voerden ons door t'Roode Meer.
3. Dat Lam met synen Bloet en doot
Halp ons haest uyter grooten noot,
Doen voor ons street die Heere Christ,
Dies d'Vyandt boos verdroncken is.
4. Dit is dat rechte Paeschelam,
Ghebraden aen des Cruyces stam,
Daer van nutlijck te eten is,
Dat is die lief Heer Jesus Christ.
5. Dit is dat rechte Soete-broot,
D'welck van ons drijft den eew'gen doot,
Des Lams bloet wy drincken daer by,
So zijn wy door den Tyran vry.
6. Ach lieve Godt, hoe connen wy
Voor sulcken Offer dancken dy,
Daer door wy van die Tyranny
Verlost zijn, en geworden vry,
7. Ghy Lam zijt aller eeren weert,
Dies men dy billick roemt end' eert,
Dy seydt die gantsche Christenheyt
Lof, Eer en Danck in eewicheyt.