De C.L. psalmen des conincklijcken propheten Davids

Psalm. CXLV. Exaltabo te Deus.

Op de Voys: Nu Looff mijn Siel den HEEREN.

MYn GOdt ick wil dy Roemen,
Want ghy zijt Coninck vol van Eer
End Loven sonder schroomen,
Dijn Naem ymmer end Eewich meer
Daeg'licx wil ick verconden
Dijn Loff end Naeme vroet,
Jaer Roement t'Allen stonden,
De HEEr is wonder groot,
Seer Loff'lijck boven Mate,
Niemandt wtspreken mach,
Syn Heerlickheyt end State,
Kindts kindren alden dach.

2. Heer van dijn Heerlijck Glory
End van dijn wonderheyden soet,

[fol.  CLxxiiij.v]

 

Wil ick maecken Memory,

 

Dat men daer van vermanen moet

 

Van dijn Heerlijcke Daden,

 

Vertellen dijne Eer.

 

Dijn Goetheyt groot van Baten,

 

End Prijsen altoos meer

 

Dijn G'rechticheydt verheven,

 

Ghenaedich, end daer neven,

 

Gheduldich, Goedich seer.

 

 

 

3. De Heer Weldadich allen

 

Ontfermt hem over syne Werck,

 

Dies sullens met gheschalle,

 

Dy (Heer) oock dancken alle sterck,

 

Dijn Heyl'gen sullen Prijsen,

 

Dijns Rijcks groote Eer.

 

End gaen met Roem bewijsen,

 

Dijn Almacht altijdt meer

 

End over al verbreyden

 

Dijns Rijckes Heerlickheyt,

 

Die Nacoemling' bescheyden,

 

Van dijne Vromicheyt.

 

 

 

4. HEER, Eewich is dijn Rijcke,

 

Dijn Heerschappijen sonder Eynd,

 

Des HEEren Hulp niet wijcke

 

Van dien, die vallen in Elend.

 

Hy helpt weer op met Machten

 

Die Neer gheslaghen zijn,

 

HEEr, alle Ooghen wachten

[fol.  CLxxv.r]

 

Van dy haer Spijse fijn,

 

Als dijne Handt dan ghevet

 

Yeg'lijck tot syner Tijdt,

 

Versaedt is al wat Levet,

 

End voelt hem wel verblijdt.

 

 

 

5. Rechtveerdich is de HEERE,

 

In alle syne Weghen reyn,

 

Jae Heylich end vol Eere

 

In all' syn Wercken oock Certeyn,

 

De HEER is nae by allen,

 

Die hem Aenroepen recht,

 

Troostloos laet hy niet vallen,

 

Die hem betrouwen slecht.

 

All' die den HEERE vreesen,

 

Hy doet nae haer begeer

 

End gaet hier wel ghenesen,

 

Haer Stem verhoort de HEER.

 

 

 

6. De HEEre gaet Behoeden

 

All' die hem Lieven (tis haer GOdt)

 

Maer Eewich sal hy Dooden

 

All' die daer syn t'Godloose Rot,

 

(Aenmerckt ghy menschen even,

 

Het mach Faelgeeren niet,

 

Ten HEER wilt u begheven

 

Vermijden groot Verdriet)

 

Mijn Mondt sal t'Loff des HEEren

 

Verconden Openbaer,

 

All' Vleesch syn Naem gae Eeren,

 

End Heyl'gen Eewich daer.