Den christelycken dool-hof

Door-vlochten, ende verciert met godtvruchtige liedekens

[p. 19]

Liedeken tot vermaeninghe van den
Sondaer.

Stemme. Godt hongh aen't Cruys.

OSondaer groot, opent eens uwe ooghen,

Hoe can uw' ziel soo swaren last ghedooghen,

Als ghy nu lydt
Door alle het verwyt,
't Welck ghy inwendigh dickmaels moet verdraegen,
O lieve ziel, ô lieve ziel,
O lieve zlel, het zijn noch soeter plaeghen
Dan ghy verdint, dan ghy verdint,

[p. 20]

 

Dan ghy verdint, myn weder spannigh Kindt.

 

2. Wort gy verdoemt g'en moet het my niet wyten

 

Te laet ô mensch vrees ick dat ghy sult kryten:

 

Want ghy misacht

 

Die u nu heeft verwacht

 

Soo langhen tydt, daer ick u wel can derven;

 

Ick sorgh voor u, ick sorgh voor u,

 

Ick sorgh voor u, oft ghy eens quaemt te sterven

 

In uwe sond', in uwe sond',

 

In uwe sond', betert u toch terstont.

 

3. Bekeert u ras, gh'en sult niet langh meer leven,

 

De werelt die sal u seer haest begheven,

 

Voor uwen loon

 

Sal sy een doorne Croon

[p. 21]

 

In uw' memori', en verstandt gaen drucken;

 

Cryght ghy goet end', cryght ghy goet end'

 

Cryght ghy goet end', soo sal't u wel ghelucken:

 

Ach peyst altijdt, ach peyst altijdt,

 

Ach peyst altijdt, op dien bangen strydt.

 

4. Betrouwt op my; al had' ghy soo veel sonden

 

Alleen ghedaen, die men oyt sou verconden:

 

Verliest noyt moet,

 

Ick ben het eeuwigh goet;

 

'k En sal van mijnen cant u noyt ontbreken,

 

Mijn hert is vol, mijn hert is vol,

 

Mijn hert is vol, van soete minne treken;

 

Met eenen sucht, met eenen sucht,

 

Met eenen sucht, verkrijght ghy groote vrucht.