Den Bibel, Inhoudende dat Oude ende Nieuwe Testament (Biestkensbijbel)

¶ Dat .iiij. Capittel.

¶ Godt beclaecht hem van de boosheyt des volcks, ende der Priesteren. Hy berisptse van haerder Afgoderie, ende voorseyt haer de straffinghe.

1

⁺ HOort ghy kinderen Israels des HEEREN woordt, Want de HEEre heeft oorsake te schelden met de inwoonders des Lants. Want daer en is gheen trouwe, gheen liefde, geen woort Gods inden Lande,

+ A vers 1

2

Maer Gods lasteringhe,^* liegen, moorden, stelen,^† ende ouerspel doen, heeft de ouerhant ghenomen, Ende deen bloetschult coemt na dandere.

* Leuit. 19.c.11.

† Ex. 20.b.14 Iere. 7.a.9. 9.a.2. 23.b.10.

3

Daerom sal^* dat Lant iammerlijcken staen, ende het sal allen inwoonders qualijcken gaen. Want oock de dieren opten velde, ende de vogelen onder den Hemel, ende de visschen inder zee, sullen verdaen worden.

* Ier. 12.a.4. 14.a.2.

4

Doch men derf niet^† schelden, noch yemanden straffen, want dijn volck is als die, die de Priesters schelden.

† Berispen.

5

Daerom sult ghy des daechs vallen, Ende de Propheet des nachts met v vallen, Also wil ich dijn moeder verordeelen.

6

⁺ Mijn volck is verloren, Daerom, dattet niet leeren en wil,^† Want ghy verwerpt Gods woort, daerom wil ick v oock verwerpen, dat ghy mijn Priester niet en sult zijn.

+ B vers 6

† Esaie. 5.b.13. Mala. 1.a.7.

7

Ghy vergeet de wet dijns Gods, daerom wil ick oock uwer kinderen vergeten. Hoe dat haerder meer wordt, hoe dat sy meer teghen my sondighen, Daeromme wil ick hare eere tot schanden maken.

8

^* Sy eten den Sondoffer mijns volcx, ende zijn begherich na haren sonden,

* Leui. 6.d.26.

9

^† Daeromme salt den volcke, ghelijck als den Priesteren, gaen. Want ick wil haer doen besoecken, ende haer vergelden, als sy verdienen,

† Esai. 24.a.2.

10

^* Alsoo dat sy sullen eten, ende niet versaedt worden, Hoererie bedrijuen, ende ten sal haer niet ghelucken, Daerom dat sy den HEERE verlaten hebben, ende hem niet en achten.

* Leui. 26.d.26 Mich. 6.c.14 Hag. 1.a.6.

11

Hoererie^* wijn, ende most, maken dwasen.^† Mijn volck vraecht zijn hout,

* Prou. 20.a.1.

† 4.Re. 1.a.2.

[p. 78r]

12

Ende zijnen staf sal hem prediken. Want der hoererien geest verleytse, dat sy tegen haren God hoererie bedrijuen,

13

^+† Bouen op de bergen offeren sy, Ende op de hueuelen wieroocken sy, Onder de Eycken, Linden ende Buecken, want die hebben fijne schaduwen. Daerom sullen uwe dochteren oock tot hoeren, Ende uwe bruyts tot ouerspeelderssen worden.

+ C vers 13

† 4.Reg. 17.b.11.

14

Ende ick en wils oock niet beletten, als uwe dochteren, ende bruyts gescheynt, ende tot hoeren worden.^† Want ghy eenen anderen Godsdienst opricht metten hoeren, ende offert metten boeuinnen, Want dat dulle volck wil gheslagen zijn.

† Nume. 25.a.3

15

Wilt ghy Israel ymmers hoererie bedrijuen, Dat hem doch Iuda oock slechs niet en beschuldichde. En gaet niet na Gilgal, ende en coemt niet op tot^† BethAuen, ende en^‡ sweret niet (soo waerachtich als de HEEre leeft)

† 3.Reg. 12.d.29

‡ Deu. 10.d.20

16

Want Israel loopt als een dulle koe, Daerom salse de HEEre oock laten weyden, ghelijck een Lam dat verdoolt loopt.

17

Want Ephraim heeft hem^* totten Afgoden verselt, daerom laet hem henen varen.

* 3.Reg. 12.d.28

18

Sy hebben haer in de swelgerie ende hoererie gegeuen Hare Heeren hebben lust daer toe, dat sy schande aenrichten.

19

Eenen wint met zijne vlogelen salse ghebonden wech drijuen, ende moeten ouer haren Offer tot schanden worden.