Den Bibel, Inhoudende dat Oude ende Nieuwe Testament (Biestkensbijbel)

¶ Den Cxxxv. Psalm.

Haleluya.

1

⁺LOeft^† den Naem des HEEren, loeft ghy knechten den HEEre.

+ A vers 1

† Psal. 113.a.1. 134.a.1.

2

Ghy die staet int huys des HEEren, in de houen des huys onses Gods.

3

Loeft den HEEre,^† want de HEEre is vriendelijc: Lof singet zijnen Naem want hy is lieffelijck.

† Psal. 34.a.9. 118.a.1. 136.a.1

4

^* Want de HEEre heeft hem Iacob vercoren: Israel tot zijnen^† eygendom.

* Deut. 4.c.20. 10.c.15. 4.Es. 6.f.54.

† Exod. 19.a.5 1.Pet. 2.b.9.

5

Want ick weet, dat de HEEre groot is, ende onse HEEre voor alle goden.

6

^* Al wat hy wil, dat doet hy, in den Hemel, op Aerden, in de See, ende in allen diepten.

* 1.Reg. 3.d.18

7

^+‡ Die de wolcken laet op gaen vanden eynde der aerden: Die den blixem metten reghen maect: Die den windt wt heymemelijcke plaetsen comen laet.

+ B vers 7

‡ Iere. 10.c.13. 51.c.16.

8

^* Die de eerstegheboorten sloech in Egypten, beyde der menschen ende des vees.

* Exod. 12.e.29. Psal. 78.e.51. 136.a.10.

9

^† Ende liet zijn teeckenen ende wonderen comen ouer dy Egypten lant, ouer Pharao ende alle zijne knechten.

† Exod. 7. 8. 9. 10. 12.

10

^† Die vele volcken sloech, ende doodede machtighe Coninghen.

† Iosue. 12.a.1.b.7. Psal. 136.b.17

11

^* Sihon der Amorrithen Coninck, ende Og den Coninc te Basan, ende alle Coninckrijcken in Canaan.

* Deute. 3.a.1. Nu. 21.d.24.f.33.

12

^‡ Ende gaf haer Lant tot Erue, tot Erue zijnen volcke Israel.

‡ Iosue. 13.b.7

13

HEERE, uwen Naem duert eewelijck, uwe ghedachtenisse HEEre duert voort ende voort.

14

^† Want de HEEre sal zijn volck richten, ende zijn knechten ghenadich zijn.

† Deut. 32.e.43 2.Mac. 7.a.6

15

^+* Der Heyden afgoden zijn siluer ende gout, van menschen handen ghemaect.

+ C vers 15

* Psa. 115.a.4 Esai. 44.b.9 46.a.4. Iere. 10.a.3. Apoc. 9.c.20.

16

Sy hebben monden, ende en spreken niet: Sy hebben oogen ende en sien niet.

17

Sy hebben ooren ende en hooren niet: Ooc en is geenen aessem in haren mont.

18

^* Die sulcke maken, zijn ghelijck also, alle die op sulcke hopen.

* Psal. 115.a.8.

19

Dat huys Israels loue den HEEre: Loeft den HEEre, ghy vanden huyse Aarons.

20

Ghy vanden huyse Leui, loeft den HEEre: Ghy die den HEEre vreest, loeft den HEEre.

Gheloeft sy de HEEre wt Sion, die te Ierusalem woont. Haleluia.