Den Bibel, Inhoudende dat Oude ende Nieuwe Testament (Biestkensbijbel)

¶ Den .Cxxxij. Psalm.

Een Liet int hooghe Choor.

1

⁺GHedenct HEEre aen Dauid, ende aen alle zijn lijden.

+ A vers 1

2

^* Die den HEEre swoer, ende beloefde den machtighen Iacobs.

* 2.Reg. 7.b.8. 1.Par. 23.b.7.

3

Ick en wil niet inder hutten mijns huys gaen: Noch mi op den Leger mijns beddes legghen.

4

Ick en wil mijn ooghen niet laten slapen, noch mijn oogenschelen sluymeren.

5

Tot dat ick een stede vinde voor den HEEre, ter wooninghe den machtigen Iacobs.

6

Siet, wy hooren van haer in Ephrata, wy hebbense gheuonden op den velde des wouts.

7

Wy willen in zijn wooninghe gaen, ende aenbidden voor zijn voetschabelle.

8

HEEre^† maect v op tot uwer rusten, ghy ende de kiste dijnder Macht.

† 2.Par. 6.g.41

9

^† Laet uwe Priesters haer cleeden met gherechticheyt, ende uwe heylighen haer verhueghen.

† Exod. 28.a.2. Ephe. 6.b.14

10

En neemt niet wech dat Regiment ws ghesalfden, om ws knechts Dauids wille.

11

⁺De HEEre heeft Dauid eenen warachtighen eedt gesworen, daer en sal hy hem niet af wenden: Ic^† wil v op uwen stoel setten de vrucht ws lijfs.

+ B vers 11

† 2.Reg. 7.c.12. Psal. 89.a.4. Act. 2.d.30.

12

Ist dat uwe kinderen mijn verbont houden, ende mijn getuygenissen die ick haer leeren sal, soo sullen oock haer kinderen op uwen stoel sitten eewelijck.

13

^* Want de HEEre heeft Sion vercoren, ende heeft lust aldaer te woonen.

* Psal. 78.g.68 87.a.2.

14

Dit is mijn ruste eewelijck, hier wil ick woonen, want het behaecht my wel.

15

^* Ick wil haer spijse seghenen, ende haer armen broots ghenoech gheuen.

* Psal. 22.d.27.

16

^† Haer Priesteren wil ick met Heyl becleeden, ende haer heyligen sullen vrolijck zijn.

† Esai. 61.b.10.

17

Aldaer sal opgaen den^* horen Dauids^† ick heb mijnen ghesalfden een Lanterne toe gherichtet.

* Luc. 1.f.69.

† 3.Re. 11.f.36. 15.a.4.

18

Sijn vianden wil ick met schanden becleeden: Maer ouer hem sal bloeyen zijn Croone.