Den Bibel, Inhoudende dat Oude ende Nieuwe Testament (Biestkensbijbel)

¶ Den .Cxvj. Psalm.⁺

+ Den .Cxiiij. byden latijnen.

1

⁺DAt is my lief, dat de HEEre mijn stemme ende mijn smeecken hoort.

+ A vers 1

2

Dat hy zijn oore tot my neyget, daerom wil ick hem mijn leefdaghe aenroepen.

3

Stricken^† des doots hadden my omuangen, ende ancxten der Hellen hadden my gheraeckt, Ick quam in iammer ende noot.

† 2.Reg. 22.a.5. Psal. 18.a.5.

4

Maer ick riep aen den Naem des HEEREN: O HEEre verlost mijn siele.

5

^+* De HEERE is ghenadich ende rechtuaerdich, ende onse Godt is barmhertich.

+ B vers 5

* Exod. 34.a.6 Psal. 86.c.15. 103.a.8. 145.a.8. Iohel. 2.c.13. Ionas. 4.a.2.

6

De HEERE behoedt de eenuuldighe: Wanneer ick onder ligghe, so helpt hy my.

7

Weest nv weder te vreden mijn siele, want de HEEre doet v dat goede.

8

^* Want ghy hebt mijn siele wt de doot ghetrocken, mijn oogen vanden tranen, mijnen Voet van slipperen.

* Psal. 56.b.13.

9

Ic wil wandelen voor den HEEre, inden Lande der Leuendigher.

10

^+* Ick gelooue, daerom spreke ic: Maer ick worde seer gheplaecht.

+ C vers 10

* 2.Cor. 4.b.13. Hier beghint den .cxv. psalm byden latijnen.

11

Ick sprack in mijn versaghen:^† Alle menschen zijn Lueghenaers.

† Rom. 3.a.4.

12

^‡ Hoe sal ick den HEEre vergelden, alle zijn weldaet die hy my doet?

‡ Mich. 6.b.6. Psal. 103.a.2.

13

Ick wil den Heylsamen Kelc nemen, ende des HEEren Naem prediken.

14

Ick wil mijn ghelooften den HEEre betalen, voor alle zijn Volck.

15

^† De doot zijnder heylighen is weert ghehouden voor den HEERE.

† Apoc. 14.b.13

16

^* O HEEre ick ben v knecht,^† ick ben v knecht, uwer dienstmaecht sone, ghy hebt mijn banden ghebroken.

* Sapi. 9.a.5.

† Psa. 86.c.16

17

^* V wil ick Danck offeren, ende des HEEREN Naem prediken.

* Leuit. 7.b.12.

18

^† Ick wil mijn gelooften den HEEre betalen, voor alle zijn Volck.

† Iona. 2.b.9.

19

Inde Houen aent huys des HEEren: In v Ierusalem. Haleluia.