Den Bibel, Inhoudende dat Oude ende Nieuwe Testament (Biestkensbijbel)

¶ Den .xcix. Psalm.

1

⁺DE HEEre^† is Coninck, daerom rasen de volcken.

^* Hy sit op Cherubin, daerom beroert haer de werelt.

+ A vers 1

† Psal. 44.a.5 93.a.1. 97.a.1.

* Psal. 80.a.2.

2

De HEEre is groot te Sion, ende hooghe bouen alle volcken.

3

Men dancke uwen grooten ende wonderlijcken Naem,^* die daer heylich is.

* Mat. 6.b.9. Luce. 11.a.2.

4

Int rijcke deses Conincx heeftmen dat recht lief, ghy gheeft rechtuaerdicheydt, ghy bestelt ghericht ende gherechticheyt in Iacob.

5

Verheft den HEEre onsen God, aenbidt tot zijnder^† voetbancke, want hy is heylich.

† 1.Par. 29.a.2.

6

⁺Moyses ende Aaron onder zijn Priesteren, ende Samuel onder den ghenen die sinen naem aenroepen, si riepen aen den HEEre, ende hy verhoordese.

+ B vers 6

7

^* Hy sprack met hen door een wolckcolumne: Sy hielden zijn ghetuyghenissen ende gheboden, die hy hen gaf.

* Num. 12.a.5. 1.Regum. 3.a.4

8

HEEre ghy zijt onse Godt, ghy verhoordese, ghy Godt vergaeft hen, ende straftet haer doen.

9

Verhooget den HEEre onsen God, ende aenbidt tot sinen heylighen berch,^† want de HEEre onse God is heylich.

† Leuit. 19.a.2. 20.b.7. 1.Pet. 1.c.16.