Den Bibel, Inhoudende dat Oude ende Nieuwe Testament (Biestkensbijbel)

¶ Dat .x. Capittel.

¶ Rehabeam de Coninck vertoornt dat volck, ende hy beswaertse, ende ende hy doetse van hem af vallen.

1

⁺ REhabeam^* trock na Sichem, want gheheel Israel was te Sichem gecomen, om hem Coninck te maken.

+ A vers 1

* 3.Reg. 12.a.1.

2

Ende doen dat Ierobeam hoorde, de sone Nebath, die in Egipten was^† (daer hy voor den Coninck Salomo geulucht

† 3.Re. 11.g.40.

[p. 166r]

was) quam hy weder wt Egipten.

3

Ende si seynden derwaerts, ende lieten hem roepen. Ende Ierobeam quam metten gheheelen Israel, ende spraken met Rehabeam, seggende:

4

V vader heeft onse iock te hert ghemaeckt, dus maeckt ghy nv den herden dienst ws vaders, ende dat swaer iock dat hy op ons gheleyt heeft, lichter: Soo willen wy v onderdanich zijn.

5

Hy sprack tot hen: Coemt ouer drie daghen weder tot my. Ende dat volck ghinck wech.

6

⁺ Ende de Coninck Rehabeam vraechde raet den Ouders die voor sinen vader Salomo ghestaen hadden, doe hy noch leefde, ende sprack: Hoe raet ghy dat ick desen volcke antwoort geue.

+ B vers 6

7

Sy spraken met hem, ende seyden: Ist dat ghi desen volcke vriendelijck zijt, en dat ghyse goedelijc handelt, ende hen goede woorden gheeft, soo sullen si v altoos onderdanich zijn.

8

Maer hy verliet den raet der ouders, dien si hem ghegeuen hadden, ende ginc metten iongen te rade, die met hem opgewassen waren, ende voor hem stonden,

9

Ende sprack tot hen: Wat raet ghy dat wy desen volcke antwoorden, die met my ghesproken hebben, ende segghen: Verlicht dat ioc dat v vader op ons geleyt heeft?

10

Mer de iongers die met hem op ghewassen waren, spraken met hem seggende: Dus sult ghy segghen totten volcke, dat met v ghesproken heeft ende gheseyt: V vader heeft ons iock te swaer ghemaect, maect ghy ons iock lichter, ende segt tot hen: Mijnen cleynsten vingher sal dicker zijn, dan mijns vaders lendenen.

11

⁺ Heeft v mijn vader te swaren ioc op v geladen, soo wil ick ws iocx noch meer maken. Mijn vader heeft v met roeden ghecastijt, maer ic wil v met scorpioenen castijen.

+ C vers 11

12

Als nv Ierobeam ende allet volc tot Rehabeam quam, opten derden dach, so de Coninc geseyt had: Coemt weder tot my opten derden dach,

13

Soo antwoorde hen de Coninck herdelijc. Ende de Coninc Rehabeam verliet den raet der ouders,

14

Ende sprac met hen na den raet der iongen, segghende: Heeft mijn vader v iock te swaer ghemaect, soo wil icker noch meer toe doen. Mijn vader heeft v met roeden gecastijt, maer ick wil v met scorpioenen castijen.

15

Also en gaf de Coninc den volcke geen ghehoor, want het was also van Gode gheweynt,^† op dat de HEEre zijn woort beuestigen soude, dat hy ghesproken had door Ahia van Silo, tot Ierobeam den sone Nebath.

† 3.Reg. 11.e.31.

16

⁺ Maer doen dat geheel Israel sach, dat hen de Coninc geen ghehoor en gaf, antwoorde dat volc den Coninc, ende sprac: Wat hebben wy dan voor een deel aen Dauid, oft erffenisse aen den soon Isai? Elck man van Israel make hem nae zijnder Hutten. Soo siet ghy nv tot uwen huyse Dauid. Ende dat gheheel Israel ginc in zijn Hutten,

+ D vers 16

17

Alsoo dat Rehabeam slechts alleen ouer de kinderen Israels regeerde, die inde steden Iuda woonden.

18

De Coninc Rehabeam sant Hadoram den Rentmeester, mer de kinderen Israels steenden hem ter doot. Ende de Coninck Rehabeam clam rasch op sinen wagen, dat hy vluchten soude nae Ierusalem.

19

Alsoo viel Israel af vanden huyse Dauids tot op desen dach.