Bible in duytsche (Delftse bijbel 1477)

[1]

1

INden eersten iaere cyri des conincs van persen op dat veruollet soude werden twoert sheren wt den monde iheremie. heeft die heer verwect den gheest cyri des conincs van persen: ende heeft ouergheleet een stemme in al sijnen rijc: oec doer scrift segghende.

2

Dit seit cyrus coninc van persen. Die heer god shemels heeft mi ghegheuen alle die rijken der aerden: ende hij heeft mij geboden te timmeren hem een huys in iherusalem: welc is in iudea.

3

Wie is onder v van al sijnen volc? Sijn heer sij mit hem Hi moet opclimmen in iherusalem welc is in iudea: ende timmeren thuys gods israhel: hi is god die is in iherusalem.

4

Ende alle andere in allen steden waer sij wonen moeten hem helpen mannen van hoere stede. mit siluer ende gout ende rijcdom ende beesten: wtghenomen dat sij willichlic offeren den tempel gods welc is in iherusalem.

5

Ende die princen der vaderen van iuda ende beniamin. ende priesteren ende leuiten sijn opghestaen: ende al wies gheeft god heeft verwerct: dat hij opclom te timmeren den tempel sheren dat was in iherusalem.

6

Ende alle die waren in den ommeganc hebben gheholpen hoer handen in silueren vaten ende gouden. in rijcdom ende beesten in huysraet: wtghenomen dien dingen die sij willichlic hadden toe ghebrocht.

7

Ende coninc cyrus brocht voert die vaten des tempels sheren die nabuchodonosor ghedraghen had van iherusalem ende gheset had in den tempel sijns gods.

8

Mer cyrus coninc van persen heeft die voertghebrocht doer die hant mitridatis die soon was gazabar: ende heeft die toe ghetelt sasabasar den prince iude:

9

ende dit is hoer ghe-

[p. *91]

tal. Dertich gouden scalen: dusent silueren scalen: neghen ende twintich messen: dertich gouden nappen:

10

vierhondert ende tien silueren nappen die anderde: ende dusent andere vaten.

11

Alle vaten gouden ende silueren: vijf dusent vier hondert. Alle dese nam sasabasar: mit desen die op clommen vander ouerwaderinghe babilonis in iherusalem.