Bible in duytsche (Delftse bijbel 1477)

[1]

1

HEer god almachtich onser vaderen abraham ysaac ende iacob ende horen rechtuaerdighen sade.

2

die ghemaect hebste hemel ende aerde mit al hoer vercieringhe:

3

die gheteikent hebste die zee mitten woerde dijns ghebodts: die besloten hebste den afgront ende gheteikent dijne veruaerliken ende loofliken naem.

4

welc alle menschen vruchten. ende ontsien vanden aensicht dijnre cracht:

5

ende onlidelic is die toorn dijnre dreighinghe op die sondaren:

6

mer onghemeten ende niet ondersoekelic die barmherticheit dijnre belooften:

7

want du biste die alre hoochste heer op al der aerden langmoedich. ende seer barmhertich: ende berou hebbende op die quaetheit der menschen.

8

Mer du heer na dijnre goetheit hebste geloeft penitenci des verlatenis der sonden: ende du god der rechtuaerdiger. en hebste niet gheset penitenci den rechtvaerdighen. abraham ysaac ende iacob. desen die di niet ghesondicht en hebben:

9

want ic ghesondicht heb bouen tghetal des sandes in die zee. mijn boosheiden sijn vermenichuoudicht:

10

ic bin ghecromt mit veel banden des isers. ende mi en is gheen verblasinghe: want ic heb verwect dijn toirnicheit ende ic heb quaet

[p. *90]

ghedaen voer dij settende versmadinge ende menichfoudich makendr vertoorninghe.

11

Ende nu buich ic die knien mijns herten: heer biddende tot di goetheit.

12

Ic heb ghesondicht: heer ic heb ghesondicht ende ic beken mijn boosheit

13

Ic begeer biddende di heer verghif mij verghif mij: ende wilt niet te samen verderuen mi mit minen sonden: ende niet int ewich en behout mi die quaetheden:

14

want du salste behouden mij onwaerdich na dijn grote barmherticheit:

15

ende ic sal dij louen altoes in al den daghen mijns leuens: want dij looft alle cracht der hemelen. ende die is glori inder ewicheit. Amen

§ Hier is wt dat anderde boock van paralepomenon. Ende dat ghebet van manasses des conincs van iuda.