Bible in duytsche (Delftse bijbel 1477)

§ Ca I

1

DAt visioen abdye. Dit seyt god die heer tot edom. Wi hebben een gehoer gehoert vanden heer ende hi heeft ghesent enen bode totten heydenen. Staet op ende laet ons tsamen opstaen teghen hem inden strijt.

2

Siet ic heb di cleyn gegeuen onder den heydenen. Du biste seer versmadelic.

3

Die houerdie dijns herten heeft di op gheboert die woenste in die scoren der stenen: ende verhefste dinen stoel Die segtste in dijnre herten. Wie sal mi of trecken inder aerden?

4

Ist sake dattu verheuen waertste als die aerne: ende du setste dijnen nest onder die sterren: die heer seit ic sal di of trecken van daer.

5

Waert dat die dieuen waren inghegaen tot di. ist sake dat die moerders waren ingegaen tot di inder nacht hoe soutstu hebben ghezweghen? En souden si niet ghestolen hebben dat hem ghenoech geweeft had? Waert dat die wijnsniders waren inghegaen tot di: en souden si niet di druuen ghelaten hebben?

6

Hoe hebben si ondersocht esau? Si hebben ondersocht sijn verholen dingen:

7

tot den eynde hebben si di wtgesent: alle die mannen dijns vreden hebben di bespot. Die mannen dijns vreden hebben ghemoghen teghen di Die mit di eten: sullen laghen legghen onder di. Gheen wijsheit en is in hem

8

Die heer seit en sal ic niet in dien daghe verderuen die wijsen van ydumea ende die wijsheit vanden berch esau?

9

Ende dijn stercken vanden suden sullen vresen: dat steruen sal die man vanden berch esau: om die dootslach

10

ende om die boesheit in dijnen broeder iacob. Bescamenisse sal di bedecken: ende du sultste vergaen inder ewicheit.

11

Inden daghe doe du stontste tegen hem. doe die vreemden vinghen sijn heer. ende die van

[p. *550]

buyten ginghen in sijn poerten: ende op iherusalem worpen sij loten: ende du waerste als een van hem.

12

Ende du en sultste niet versmaden dijnen broeder in sijnen daghen: inden dach sijnre pelgremaedze. Ende du en sultste niet verblijden op die sonen iuda inden dach hoerre verderfnisse: ende du en sultste niet groet maken dijnen mont inden dach der nauwicheit

13

Noch ghi en sult niet ingaen in die poerte mijns volcs inden dach hoers valles: noch du en sultsten niet versmaden in sijnen quaden. inden dach sijnre verderfnisse. Ende ghi en sult niet wtsenden teghen sijn heer inden dach sijnre verderfnisse

14

noch en sult niet staen inden wtgangen om doot te slaen die vlien. Ende en sult niet besluten die ouerblijuen van hem in den dach sijnre tribulacien:

15

want bij is die dach sheren op allen volcken. Alstu ghedaen hebtste sal di gheshien: ic sal keren dijn wedergeuen in dijn hoeft

16

Want als ghi gedroncken hebt op minen heylighen berch. sullen drincken alle volcken ewelijc: ende sullen drincken ende verslinden: ende sullen sijn of sij niet en waren.

17

Ende inden berch syon sal sijn gesondmakinghe: ende hi sal wesen heylich. Ende thuysghesin van iacob sal besitten die gheen die hem beseten hebbe.

18

Ende thuys van iacob sal wesen vier: ende thuys van ioseph een vlamme: ende thuys van esau een stoppel. Ende sullen worden ontsteken in hem ende sullense verslinden: ende gheen ouerbliuinghe en sullen sijn des huys esau: want die heer ghesproken heeft

19

ende die sijn int suden sullen te erue ontfanghen den berch esau: ende die sijn inden velden philistijm: sullen besitten dat lantscap ephraym: ende tlant van samarien. Ende benyamin sal besitten galaad

20

ende die ouerwanderinghe des heers der sonen van israhel sal besitten alle die steden der cananeen tot sareptam toe: ende die ouerwanderinghe van iherusalem die in bosforo is sal besitten die steden des sudens.

21

Ende die ghesontmakers sullen opclimmen inden berch syon om te oerdelen den berch esau ende trijck sal sijn den heer.