Apollo of Ghesangh der Musen

Sonnet.

VVAerom lief schroomt ghy so, als door de Min mijn ooghen,
Tot uwaert vlieghen snel, om toonen u mijn liefd,
Ontwijckt soo niet de brandt die in my is ghegrijft,
Door u vermoghen vrou, en is om 't hert ghetooghen,

[p. 116]

 

Vliecht niet soo snel van my, ick soeck u eer te hoogen,

 

Veel meer als reyn Diaen zijt ghy van my gheacht,

 

Ghy draecht die schoonheyts roem veer boven Venus sacht,

 

Deuchtrijck natuerens beeldt tot u is't hert ghevlogen.

 

Troost eens u trou slavoen, die g'lijc als AEtna gloeyt,

 

Met opghesteghen vlam, in liefde krachtich bloeyt,

 

Weest Goden mijn ghetuych, ghy kent het hert en sinnen.

 

Schoon ziele van mijn ziel, op queecster van mijn jeucht,

 

Besitster van 't ghemoet, die my geeft druck en vreucht,

 

Ghy valt my al te stuyr, nochtans ick moet u minnen.

E.D. Dient u beter.