Apollo of Ghesangh der Musen

[p. 114]

Een nieu Amoreus-Liedeken,

Op de wijse: Brande Yrlandt.

BLinde Godt der Min
Ghy ontvoert mijn hert en sin,
Door een schoone Maeght,
Die de kroone draeght,
Fleur van 't hert,
Hemels Koningin,
Gheeft my troost reen tot ghewin,
Want u weesen soet,
My gheneesen moet
Van de smert:
Cupido heeft my ghewont,
Gulden vrou maeckt my ghesont,
Laet liefd bloeyen net,
Wilt uytsproeyen het
Sins verwert.

Blonde Ionck-vrou schoon

Die int herte spant de kroon,
'K acht gheen druck noch pijn
Maer gheluck te zijn,
'T gheen my quelt,
Waerdich dat de Goon
V gaen stellen in haer troon,
Om u reyne deucht
Die gheen kleyne vreucht
In't hert melt,
Hier door ben ick int verdriet,
Maer ghy acht mijn lijden niet,
Dus ick droevich sta,
En behoevich ga
Heel ontstelt.

Venus, Iuno reyn,

En Minerv' certeyn
Niet so stadich rijck,
Noch schoon dadichlijck
Als mijn roem,
Hier in't aerdsche pleyn
Is gheen loffelijcker greyn,
Onder d'Horison
Heeft gheen Coridon
Schoonder bloem,
En de jacht-Godin Diaen
Heeft geen g'lijck by haer te staen,
Noch Najades eel
of Driades veel

[p. 115]

 

Niet by noem.

 

Want siet al berooft,

 

Son en Maen haer glans verdooft,

 

Als 't verhooghen maer

 

Van haer ooghen klaer

 

Blickrich schijnt,

 

Phoebus deckt sijn hooft

 

Als mijn lief de Hemel looft,

 

Met haer stralen licht,

 

Het bemalen sticht,

 

En verdwijnt,

 

Goden selfs verblijden haer

 

Om mijn lief t'aenschouwen klaer,

 

Want haer leeden fijn

 

Wel besneeden zijn,

 

Dit my pijnt,

 

 

 

Prince.

 

Princelijcke vrou

 

Ick gheef u mijn hert op trou,

 

Weest ghenadich my

 

Onbeschadicht 't ly

 

Weer-liefd gheeft,

 

Helpt my uyt de rou

 

Want ghy sijt mijn hoops ghebou,

 

Selfs gheduldet wondt

 

Biedt my u gulden mondt,

 

Met my leeft

 

In de ware echte staet,

 

En de schijn-deucht vals versmaet,

 

Toont my vryheyt seer,

 

En in blyheyts eer

 

Met my sweeft.

E.D. Dient om beter.