Apollo of Ghesangh der Musen


[Komt my Nimphe doch te baet]
Stem. Laboré de France. KOmt my Nimphe doch te baet Alhier in dees bedroefde staet, Wilt my, nu vry Met lust en rust ghenesen hier, Soo sal ick u o edel dier Dancken met herte bly. Want ghy siet liefste mijn Waerom dat ick lijd groote pijn, En smert, in't hert, Soo dat, ghy rat mijn 't herte raeckt, Waer door in my den brandt heel blaeckt, Al met een droeve schijn.
[pagina 111]
'T blaken van het branden hier, Wilt dat toch blussen edel dier, Verhoort een woordt, Van my, hier vry, mondeken root, Dat ick mach rusten in u schoot, Van nu en altijdt voort. Soo sal ick o Maghet reyn V dancken voor dees daedt in't pleyn, Dat ghy, seer bly, Mijn hert en smert verheuchde weer, Dat ick't ghedencke nimmermeer 'T verdriet dat ghy deedt my. Och mocht ick na mijn wellust Met u Princesse gaen te rust, En daer, voorwaer Gheneucht en vreucht bedrijven soet, Soo sou verheughen mijn ghemoet Wt een reyn hert eerbaer. Liefd verwint sterckheyt.