Apollo of Ghesangh der Musen

[p. 60]

Nieu Liedeken,

Op de wijse: Phoebus is langh over.

GHelijck een Iagher in het veldt,

Staet vroegh op om 't vvildt te bekomen,
Gheen quaet vveer maeckt hem ontstelt,
Noch geen vvreedt vvildt dat doet hem schromen,
Met VVinden en met Bracken voor
Tot dat hy vindt het vvildt sijn spoor,
Gheen tijdt gaet daer te loor.

Aldus moet ick my oock ter jacht

In't amoreuse vvoudt begheven,
Ghy Bracken neemt op 't vvildt vvel acht,
Ghy VVinden seer snel daer beneven,
En vanght dat VVildt dat ick dus jaegh,
Dat ick mach nemen een groot behaegh
Te jaghen alle daegh.

Gaet voor, gaet voor ghy VVinden snel,

Mijn Bracken die hebben het vvildt ghevonden,
En vvilt u niet toonen rebel,
Maer volght haer ras tot allen stonden:
Helaes! helaes! ick ben beducht,
My dunckt mijn Brack heeft gheen meer lucht,
Het vvildt moet zijn ghevlucht.

Schoon lief ghy zijt het vvildt alleen

Dat mijn jonck hert aldus doet jaghen,
VVant gheen ander vvildt ick meen,
In mijn jacht neemt toch behagen,
Mijn lijden is u vvel bekent,
Ick hoop 't sal nemen haest een endt
Te zijn in dit ellendt.

Mijn Bracken zijn ghestadicheyt,

Mijn VVinden moet ick hope noemen,
Ghestadich hopen alsmen seyt
Doet somvvijlen gramschap versoenen,
Ghestadich moet ick hoopen siet
VVil ick komen uyt dit verdriet,
Uyt Cupidos ghebiedt.