Middelieër liedboek

[O Heer! almachtigh]

Nae de Wijse: Nero moordadigh.

O Heer! almachtigh,
Wilt my doch verhooren,
Zijt mijns gedachtigh,
En laet my niet verloren
Gaen in dees werelt blent,
Ick bid u om ghenaden,
V geeft doch in my sent,
Wilt my doch niet versmaden.

o! Heer, verheven,

Zijt my doch ghenadigh,
Wilt my vergheven
Mijn sonden onghestadigh,
'k Heb van my selven niet
Dan sonden en ghebreken,
't Is my, o! Heer, verdriet,
Dat icker in blijf steken.

Zijt goedertieren

O! Godt, vol van ghenaden,
Wilt my doch stieren
Op uwe rechte paden,
En dat ick onbevreest

[p. 42]

 

Na uwen woordt in vreden,

 

Verleent my uwen gheest

 

Tot mijner saligheden.

 

Mocht ick beschreyen

 

Mijn sonden die my knaghen,

 

En doch niet beyen

 

Van daghe tot daghen,

 

Want mijn leven verslijt

 

Als een kleedt met verdrieten,

 

o! Heer, ghebenedijt,

 

Laet my u troost ghenieten.

 

O! Godt, verhoren,

 

Wilt my niet versmaden,

 

Laet my doch hooren

 

V stemme uyt ghenaden,

 

Want ghy, o! Heer, voorwaer,

 

En sult oock niet begeeren

 

Den doodt van den Sondaer,

 

Maer datse hen bekeeren.

 

't Blijckt seer waerachtigh

 

Dat David dede boeten,

 

Manasse klachtigh,

 

't Vrouwtjen by 's Heeren voeten,

 

Ghelijck den Tollebaer,

 

Verloren Soon misdadigh,

 

Als oock den Moordenaer,

 

o! Heer, zijt mijns ghenadigh.

 

Dat ick mach hooren

 

Met alle vrome daders,

 

Komt Wtverkoren,

 

Besit het Rijck mijns Vaders,

 

Dat voor u is bereyt

 

Door mijn groote ghenaden,

[p. 43]

 

Al in der eeuwigheydt

 

Sal ick u niet versmaden.

 

In u begeeren

 

Bevele ick al mijn saken,

 

Wilt my regeeren,

 

Ghy sultet doch wel maken,

 

En oock soo bid ick noch

 

Aen y, Heer, principaligh,

 

Verleent my immers doch,

 

o! Heer, dat my is saligh.

 

Laet my verwerven

 

Een vroom eerlijck leven,

 

En saligh sterven

 

Wilt my, o! Heer, gheven,

 

Op dat ick nae u woort

 

In liefden mach ghestadigh,

 

Mijn naesten soo 't behoort

 

Bewijsen deught weldadigh.

 

Wilt my verlichten,

 

O! Heer, door u ghenade,

 

Dat ick mach stichten

 

Mijn naesten vroegh en spade,

 

Datter doch door mijn daet

 

Gheen ergernis mach komen,

 

Bewaert my doch voor quaet,

 

Bid ick met alle vromen.

 

Dat ick mach spelen

 

Den Heer in mijner herten,

 

En hem bevelen

 

Mijn saken die my smerten,

 

Vrolijck zijn t'aller tijt,

 

Doch in de vrees des Heeren,

 

Sijn naem ghebenedijt,

[p. 44]

 

Sal ick prijsen en eeren.

 

Prins fier van boven,

 

Ghy zijt een Heer almachtigh,

 

V sal men loven

 

Met hert, gemoedt seer krachtigh,

 

Want u behoort die eer

 

Alleen in eeuwigheden,

 

Weest my ghenadigh, Heer,

 

Amen, segh ick hier mede.

I.H. Pos.