T'leven van Cornelis Cornelisz. Kunst, Schilder van Leyden.
Alhoewel in't gemeen de Const niet en erft op den kinderen, so is nochtans Cornelis Kunst,
soon en Discipel van Cornelis Engelbrechtsz. zijnen uytnemenden Vader in de Const een
dapper en treflijck naevolgher gheweest. Hy was gheboren te Leyden in't Iaer 1493. en een van de
voornaemste Schilders binnen Leyden in zijnen tijt: doch alsoo zijn Stadt in rijckdom niet
overvloeyde, door t'verloop der vreemde oft uytheemsche, die dees Stadt veeltijts welvarende
pleghen te maken, trock Cornelis Kunst somtijts voor een Iaer, dry oft vier, woonen te
Brugghe in Vlaender, wesende te dier tijdt een welvarende en rijcke Stadt, van veel vreemde
volcken besocht en bewoont, om den grooten handel die daer was ghedreven, so dat de Const daer
in groot achten, en wel betaelt is gheweest: des hy daer groot gelt heeft ghewonnen, en veel schoon wercken gedaen. Veel heerlijcke wercken heeft hy ooc ghedaen
binnen Leyden: onder ander, en sonderlinghe ten huyse van d'Heer Dirck van Sonneveldt,
alwaer is te sien een seer schoon Cruys-draginghe Christi, met de uytleydinghe der twee
Moordenaers, seer beweeghlijck uytghebeeldt wesende: als oock mede de beweginghe
Mariae, over het onghemack haers soons ons Heeren Iesu Christi, wel weerdich
ghehouden te worden voor t'alder uytnemenste van zijn Const-rijcke wercken. Daer beneffens is
noch een afdoen van t'Cruys, seer aerdigh en gloeyende ghecoloreert nae den eysch van de stoffe.
Noch ten huyse van zijn dochter Aechtgen Cornelis, een Vrouw althans van 72. Iaer, zijn te
sien zijn en zijns tweedden Huysvrouwen Conterfeytselen, gelijckse buyten Koe-poort sitten in
haren Hof, met in't verschieten een deel van der Stadt en de Koe-poort nae t'leven, wesende alles
seer aerdigh ghecoloreert. Hy hadde oock veel schoon dinghen gheschildert voor een Clooster
buyten Leyden, te Leyderdorp, die door den trubbel
Auteursrechtelijk beschermd