Een nieu Guese liede boecxken
(1576)–Anoniem Een nieu Guese liede boecxken–
AuteursrechtvrijOp de wijse van Munster, oft van Haerlinghen.Hollant, Zeelant, ghy Edel Prieel,
Al zijt ghy cleyn in v Casteel,
Prijs hebt ghy bouen schreuen,
dat ghy den Bloethont tot zijn deel
den Thienden niet wilt gheuen.
Die Staten van dat Nederlandt,
Hebben verworuen groote schandt,
Een Spaengiaert sy ontboden,
Te schatten, te scheren, te stichten Brant,
End den vromen te dooden.
Hy toonde haest zijn boosen aert,
die Graef van Egmont en Hoorn tsaert
Metten Adel hy verpletten
Hier waren de staten niet in beswaert,
dat hy brack al haer Wetten.
Dat Lant heeft hy geperturbeert,
| |
[Folio 44r]
| |
Weluaert en Neering daer wt ghekeert,
Sijn Kist ghinck hy vol schrapen,
Veel Maechden en Vroukens geuioleert,
Na de wijs der Roomscher Papen.
Hy heeft gheseyt dat hy hier quam
Van s Conincks weghen dat Lant innam
Valschelijck heeft hijt geloghen:
Paus Beul was hy met moede gram,
s Conincks Landen bedroghen.
Hollant Zeelant was wel ghemoet,
Coren de Prins haer stadthouder goet,
Voor t Vaderlandt te strijden
Jn Gods Naem, teghen Spaensche ghebroet,
Dit most den Tyran lijden.
Nu hy Hollant niet winnen can,
Zeelandt cost hem menighen Man,
Voor Haerlem zijn sy doorsteken,
Nu gaet hy loopen dees Tyran,
Die zijn leet niet can wreken.
Hij is verloopen, geeft niemant gelt,
Js dit ghedaen als een vroom Helt
Vanden Coninck ghecomen?
Jck denck wel Neen, tis anders gestelt,
Hy dient den Paus van Romen.
Een Paep hebben sy weer gehaelt,
Op dat sal blijcken onghefaelt,
Dat sy zijn Papen knechten,
Daer al die werelt op heeft gesmaelt,
Die voor haer Swaghers vechten.
| |
[Folio 44v]
| |
Maghercool, Hertoch Eerick siet,
Schouwenburch en missaeckt nu niet,
Dat ghy dient s Paus gheschoren,
Den duyuel om ghelt, sonder verdriet,
Diet Christen bloet versmoren.
Noch zijn die staten stom en doof,
Onder tdecksel van t Christen gheloof
Laten zijt Lant bederuen,
Gheuen die Spaengiaerts tot een roof
Des Conincks schoone Eruen.
Eedele Heere en staten fijn,
Siet hoe v Landen verlaten zijn,
V Coninck in Spaengien ghehouwen,
Op dat hy niet weten sal wat fenijn,
En quaet sy int Lant brouwen.
Jst voor v niet een groot oneer,
Dat ghy verlaet v eyghen Heer,
Laet d Jnquisicy regeren,
Hoereerders en Buggers, tblijckt leyder te seer,
Die t Lant gants ruineren.
Sit v Coninck nu als een Kint,
Hy can weer comen, dit versint,
Van v eysschen met reden,
Hoe hy als dan gheregeert vint,
Sijn Landen en zijn steden.
Weest niet langher so obstinaet,
Maect vreed int lant, eert valt te laet,
En soect voor alle dinghen
Het Rijcke Gods, tis Christi raet,
Tander sal hy toebringhen.
| |
[Folio 45r]
| |
Godt ons Prince sal gheuen cracht,
Ende beschermen dach en nacht
Den vromen hier op Aerden,
Die zijn woort houden in ghedacht,
Tleuen daer na aenuaerden.
Liefde vermacht al fecit Anno 1574. |
|