|
| |
Als nu Madamme de Parma de Bane weder ruym gecregen hadde, de principale Hoofden, als den Graue van Egmont ende meer andere, door listige beloften aen haer zijde ghewonnen, Js de Weerdt int Schaeckbert, namelick Ducdalbe, stoutelick int Lant gheuallen den welcken met zijn Spaensche Enghelkens, de Graef van Egmont, met andere Catholijcke seer feestelijc ingehaelt hebben, weynich vermoedende op den quaden na smaeck van de Spaensche Vijghen.
Vanden Weerdt int Schaecbert.
Op de wijse van Haerlingen.
Ghy Borghers hoort al na mijn vermaen,
Jck soud v gheern ten beste raen,
Wilt den Weert int Schaeckbert vlieden,
En wilter niet meer te Bier gaen,
Men sieter veel boosheyt gheschieden.
Om tappen was hy eens wel bedocht,
Seer neerstich heeft hy een huys gesocht,
| |
| |
Thantwerpen is hy ghecomen:
Sijn dambert heeft hy mede gebrocht,
daer heeft hy een huys vernomen.
Den Weert int gulden Vlies ydoon,
Bouen al de Tappers voerden hy de croon
Syn Bert sachmen afbreken,
Niet meer te Tappen was hem verboon,
End dat dambert was daer wt ghesteken,
Noch twee Notable Weerden vroet,
die daer bewoonden haer eygen goet
Sy tapten tot haerder vromen,
Haer Berden smeet hy onder de voet,
Met zijn volc is hy in haer huys gecomen.
Om vechten waren sy stracx bereyt,
die twee weerden hebben sy neder geleyt,
Tvolck was beroert met hoopen,
den weert int gulden Vlies voorseyt
Neerstich sachmen wech loopen.
Den Weert inde Roo Leeu vermaert,
Was met zijn volck by een vergaert,
Maer hy was oock haest verdreuen:
Elck was van desen weert veruaert,
daer zijn maer dry Tappers ghebleuen.
Den Weert int gulden vlies met sin,
Woont met den weert inde dry Lelien in,
Sy hebben haer huys vol knechten,
Twee Tappers in een huys, is cleyn ghewin
dickmael sietmen die kijuen en vechten.
Den vreemden weert int dambert hier,
| |
| |
Die heeft nu omme doen roepen zijn Bier,
Eer dat hem began tonsueren
Dat wil hy vercoopen hooch en dier,
Maer ten sal hem niet ghebueren.
Sijn gasten die hy voor vrienden hielt,
Die hadde hy geern met listen verdult,
Soot daer wel heeft ghebleken,
Hy hadde gheerne zijn Borse ghevult,
Dat Tiende Bier wilde hy haer ontreken
Die gasten maecten seer groot geluyt,
Sy smeten den Weert ter deuren wt,
Met zijn volck quam hy in sneuen,
Sy seyden, Pact wt, ghy vreemden guyt,
Wy hebben sulcks noyt ghegheuen.
So menich Borgher heeft dit verstaen,
Sy en wilden niet meer te Biere gaen,
Haer ghelt sal hem nu falen,
Hy is met zijn groote huyshuere belaen,
Hoe dat hy die sal betalen.
Als ghy met vreuchden v gelt verteert,
Gaet lieuer tot den besten Weert,
Buyten die Oosterpoort inde Werelt gepresen,
Daer vindy bereyt wat ghy begeert,
Daer wil elck mensche wel wesen.
Buyten die Noortpoort op dit termijn
Daer woont een vrouken hubsch en fijn,
Jnde Roose ouer een waterken wijden,
Men drincter goet coop bier en wijn,
| |
| |
Tvolck coemter aen alle zijden.
Neemt oorlof van dit bediet,
Als hy v meer te gaste ontbiet
Wilt van v ghelt niet wijcken,
Want den arbeyt van uwen handen siet,
Die soude hy gheerne strijcken
Anno 1570. B2, k.28,T.4.D.28.28.T.
|
|
Auteursrechtvrij