De C.L. psalmen des conincklijcken propheten Davids


Psalm. XXIX. Afferte Domino.
Op de Voys: Christus de HEER ten Jordaen quam. DEn HEre geeft syn Eer en Macht, Ghy Princen en ghy Heeren Des Heeren Mogentheyt hooch acht, Aenbedet hem met Eeren. Hy biet den Watren wat hy wil, Die Heerlijck' Godt Almachtich, Die Dondert luyd', end' daer toe veel,
[Folio xxxj.r]
Hy heerschet oock wel Crachtich Over die Zee Onstuere. 2. Des HEEren Woort heeft groote Cracht De Cedren breeckt syn stemme, Hy doet den Libanon met Macht, Opspringhen door zijn grimme, Den Berch Liban end' Syrioen, Als die Eenhoornen fiere, En springen als die Calver doen, Sijn Stem gaet met getiere, Als Vlammen vol van Viere. 3. Vreesen moet die Woestijn syn stem, En Kades oock die groote, Die Hynden syn verveert voor hem, Hy maeckt die Wouden bloote, Dies sal hem yeder man te meer, In zijnen Tempel singhen, Dancksegghen met behoorlijck Eer, End' doen syn Loff wel clinghen, In alle Landen verre. 4. Die HEEre heeft hem vast geset, Een Syndtvloet ons te maecken, Al nae des Evangelij Wet, Om tot Ghenaed' te raecken,
[Folio xxxj.v]
Die HEEr blijft Coninck Eewichlijck Sal zijns Volcx Macht verheven, Die HEERE sal met Vrede Rijck, Sijn Volck veel Segens geven, End' eyndtlijck d'Eewich Leven.