Hondert Psalmen Davids mitsgaders het ghesangk Marie, t'ghesangk Zacharie, t'ghesangk Simeons
(1561)–Jan Utenhove–
Auteursrechtvrijde thien Geboden, de artikels des Gheloofs, t’ghebed des Heeren &c. ouerghesett in Nederlandschen dichte
§ Sommighen dencken dat Dauid desen Psalm schreef, wanneer hy krygh voerde teghen die omligghende vyanden, die teghen hem t’samen ghesworen hadden: hy vertrauwt sick auer op God, dat hy ouerwinnighe teghen syn vyanden bekomen sal. MYn hertɇ, o God end Heere,
Tot singhen is bereyd,
Ick sal o myn rechtɇ eere,
Lof singhen mit bescheyd,
| |
[Folio 101v]
| |
 Du lofsangspel sta oppe,
End harp vol melody,
Dat ick daer vrough op kloppe
Den dagheraed naby.
Dat ick mit lof ontspringhe
Onder den volcken, Heer,
End dat ick dy lof singhe,
Onder die Heydens seer,
Want dyn groote ghenade
D’hemels te bouen gaet,
End dyn waerheyt gherade
De wolcken in der daed.
Verheff dy, o God Heere,
Oock bouen d’hemels frisch,
End dyn eer meer end meere
| |
[Folio 102r]
| |
Op ęrden toone sick,
Dat dyn lieue gherechten
Verlost werden een mael
Verloß door dyner rechten.
End help my, wt der quael.
God sprack, niet te verhelen,
In syn heylighdom luyd:
Ick wil Sichem bedeelen,
Suchots dal meten wt.
Gilead myn ick achte,
Manasses ick oock myn,
Ephraim myns hoofds krachte,
Iuda myn Hoofdman fyn.
Moab is myn waschketel,
Idumeam ick sal,
Mit myn voeten, doormeten.
End maken bly gheschal
Ouer de Palestynen.
Wie sal beleyden my,
In de besloten steden?
End tot in Edom vry?
Salt du niet doen God Heere?
Die ons verstooten hast,
End woust niet wtgaen meere,
Mit ons end onsɇ heyrkracht.
Help ons als nv ter stonden
Teghen onsen vyand,
Want ydel werdt beuonden
Des menschen onderstand.
| |
[Folio 102v]
| |
Męr wy, door Gods mittreden,
Sullen schoon dinghen doen,
End hy sal vry vertreden
Onse vyanden koen.
|
|