De schadt-kiste der philosophen ende poeten

[p. 188]

Nievw liedeken op de wyse;
Van de voghelen.

COmpt ghy jonghe scholieren,
Van wt alle cortieren,
VVilt vrolijcken creijieren,
Sprinckt nu vrij wtter muijten,
VVilt nu 'tgroen wout verchieren,
Met Venus camenieren,
Croontse vry met Laurieren,
Aensiet des Meys fiertuijten,
Priapus houen saen,
Seer fraey verchieret staen,
Door Flora ombelaen,
Hebben wy nu ontfaen,
Seer veel fraey blomkens schoone,
Schijnckt sy elcken persoone,
Sy staen lieflijck ten thoone,
Ceres bly omghescoort,
Brenckt veel schoon vruchten voort,

Comt Mercuri verheuen,

Die Argus brocht om d'leuen,
Hebt inden slaep gedreuen,
Door v wel spelen vierich.
Poliphemus beneuen,
Doet hier oock vreucht aencleuen,
Laet nu soet gheluijt gheuen,
V ruijs pijpe mannierich.
Comt neghen Musen al,
Maeckt hier een bly ghescal.
Compt Pan vreest geenen val,
Speelt op v pijpken smal.
Orpheus wilt ons wincken,
Compt sonder achter dincken,
Laet nu v herpe clincken.
Compt Triton blijft ons by,
Blaest op den horen vry.

Ghy dochters hooch van namen,

VVilt v tot minnen pramen,
Compt nu recht naer 't betamen,
In desen mey vol lusten:
VVilt v gheen deuchden schamen,
Troost v lieff t'sijnder vramen,
Anders compt ghy in blamen,
Gaet met v lieffken rusten:
In Cefalus groen reijs,
Leydt v lieff met auijs.
Temis trouwe propijs,
Leert ons goet onderwijs.
Minerua t'onser eeren,
Sal om haer wijsheyt leeren,
Om lieffde te vermeeren,
Schaudt al de clappaerdts quaet,
Die saeyen haer vals saet.

Ghy Iong-mans sonder flouwen.

Hebt ghy een lieff vol trouwen,
VViltse in eeren houwen,
In lieffden op der erden.
Iason bly int aenschouwen,
Liet die schoon fleur der vrouwen,
Media int benouwen,
Hy dé als den onwerden,
Als Perceus plaijsant,
Doet v lieff onderstant,
Die door den minnen brant,
Adromeda ontbant,
Al door der minnen treken,
Is Piramus doorsteken,
Om Tisbe est ghebleken.
Lieffde Leander dwanck,
Om Ero in see spranck.

Prince.

Princen sonder vernoeyen,

VVilt v ter deuchden spoeyen,
Discordia verfoeyen,
Nu en tot allen stonden,
Ist dat ghyt v wilt moeyen,
VVilt ons const recht beuroeyen,
Altijt in lieffden groeyen.
Dat is al haer vermonden:
Vliet Eoylus wat ghy doet,
En Midas vals gebroet,
Hout Ira onder voet,
Inuidia verhoet,
Laet Mars nu ver by lyen,
Bellona wilt oock myen,
Sy willen ons bestryen,
Bemint Rethorica,
Pax met Iusticia.

Niet sonder Godt.