De schadt-kiste der philosophen ende poeten

[p. 43]

Liedeken op de wyse;
Naer Salomons gheleerden gront.

WEch Heyms met v daden quaet,
VVat hebt ghy hier bedreuen?
Ydel is uwen quaden raet,
Die ghy hier plocht te geuen,
Sneuen moet ghy als nu subyt,
VVant Maya goederhande
Maeckt ons deur haer gauen verblyt,
Dus wijse van verstande
Mint haer altijt.

VVant door haer comt den oueruloet,

Die Porus nu doet blijcken,
Penia ghelijck pouer moet
Deur Reden-rijck gaen strijcken,
Iuno seynt ons haer gauen wel
Des rijckdoms veel begberich,
Pan spelt nu vrymoedich sijn spel,
VVant Syringa niet werich
Is sijn opstel.

Nayaden heerderinnen gaen

Nu vry hun schapen weyden,
Den herder spreckt van minnen aen,
Daer hy naer plocht te beyden,
Daer en sijn nu geen Saters meer,
Die hen connen verschricken,
Dies sy nu in haer jeuchde teer
Hun vryagie beschicken
Sonder verseer.

Al deur Apollos crachten sterck

Siet men de aerd'ontpluycken,
Ieucht doet naer Themis trachten t'werck
Dat liefde wilt gbebruycken,
D'eer die comt met veel croonen voort,
Laet ons om Hebe wenschen,
Eer dat Atropos heel verstoort
T'verderuen van de menschen,
Comt vol discoort.

Prince.

Ghy princen en princieren dan

VVilt nu vreughde betoonen,
Comt en pluckt Laurieren van
Daphne, om haer te croonen,
VVant sy sticht in ons hert veel vreucht,
En doet den druck wtroeyen,
Bemint Maya ghy jonghe jeucht,
VVilt v met vreughde moeyen,
Maer groeyt in Deucht.

Myt Nyt Altyt.