Nieuw liedboek genaemt den vrolyken speelwagen

[p. 70]

Liedeken van de vuyle Clappers en Clappeyen,

Stemme: Hoe ligh ick hier in dees ellende.

KOmt vuyle Clappers en Clappeyen,
Al die met leughens omme gaet,
Wiens woorden scherp als sweerden sneyen,
Die niemandt ongheschonden laet,
Vw' tonghe neemt den mensch het leven,
En steelt dat ghy noyt weer kont gheven.

2. 't Waer beter jemandts goet ghestolen,

Als jemants eere wat verdriet,
Die dieverey blijft noch verholen,
't En schaedt den naem en faeme niet,
't Ghestolen goedt kont ghy weer gheven,
Maer jemandts eere noyt uw' leven,

3. Komt d' een Commeren by d' ander,

Sy seght de Dochter is een Hoer,
Soo diffameren sy malkander,
Kent ghy die Vrouw 's is oock van 't snoer,
Sy doet haer Man twee tacken draghen,
Sy loopt dickwils nachten en daghen.

4. Alsoo verhaelt m' jeders ghebreken,

Op straet, in huys en op de Marct,
Die achterklap hooren en spreken,
Sijn dickwijls vuylder of soo swart,
Iae 't zijn somtijdts de erghste snoeren,
Die jemandt doen den name voeren.

5 Kommen daer erghens vijf oft sesse,

Van die quay tonghen by malkaer,
Zy segghen partinent hun lesse,
d' Een seght die Man is een verraer,
Een ander seght ick weet sijn leven,
Hy kan uytstrijcken en niet gheven.

6. Ghy Clappers en Clappeyen t'samen

Keert u tot Godt en afstant doet,
En steelt dogh niemandts eer en faeme,
Ghedenckt dat ghy eens sterven moet
En dat ghy Godt van heel uw' leven,
Van klaps, eens rekeningh moet gheven.

Eynde van 't eersten Deel.

Approb. G.D.A.W.L.C.