Gheestelycke plantaige van gheestelijcke op-climmende boomen

Sy bidt hem om buyten te gaen, om daer in meerder stilte en eenigheydt te leven.

Stemme.
Cupido goedthertich, seer fierich

1.

O liefsten Godt k'verlanghe, seer stranghe
Naer u, so t'wel behoort:

[p. 62]

 

En wilt toch niet versteken, mijn spreken,

 

Eens mijn begheert aenhoort:

 

Compt aen en laet ons heden, de steden,

 

Uyt treden, en laet ons saen

 

Velden en Durpen bewoonen gaen.

 

2.

 

T'is waer u Hemels goeden, die bloeden,

 

Tot my in stadt wel seer;

 

Maer ick wau wel becommen, en brommen,

 

In deughden lanx om meer:

 

Ghy weet de steden stooren, versmooren,

 

Het hooren, van t'eeuwich goet,

 

Laet ons gaen buyten al metter spoet.

 

3.

 

De open velden gheven, het t'leven,

 

Een groote stillicheydt;

[p. 63]

 

Men leeft daer in een ruste, naer luste,

 

Gheheel in eenigheydt:

 

Men hoort daer niet vervoeren, noch roeren,

 

Noch poeren, in gheen seysoen,

 

Dat een belet aen den gheest sou doen.

 

4.

 

Mocht ick sonder verliesen, verkiesen,

 

Ick weet een Hof seer schoon;

 

Den Hof van Olieveten, te weten,

 

Die waer ons heel ydoon:

 

Ghy hebt daer in ghebeden, met zeden,

 

Uyt reden, dat hy was stil,

 

Gae wy daer henen, doet mijnen wil.

 

5.

 

Com'ick daer te gheraecken, k'sal smaecken,

 

Het ghen' dat Hemels is,

[p. 64]

 

Ghy sult my daer beweghen, ter deghen,

 

Door uwe worden fris:

 

So dat ick dus beschoncken, door-droncken,

 

Ontfoncken, seer vierich sal,

 

Want daer u vier is daer brant het al.

 

6.

 

Orlof laet ons, ons vinden, beminden,

 

Also het is gheseyt;

 

Wy sullen sonder sneven, daer leven,

 

Van yder af:gheseyt:

 

Daer by oock oeffeninghen, volbringhen,

 

Van dinghen, die eeuwich syn

 

In de presenti van u en mijn.

FINIS