Den Sendtbrief Pauli tot den Romeynen
(1582)–Johan Fruytiers–
Auteursrechtvrijop stichtsanghen gheset
[Folio D1r]
| |
 ten
Neemt op niet tot samen gesprec van twist,
2 D'een gelooft datmen alle dinc mach eten,
En die cranck is eet moes, [en vliede twist.]
3 VVie eet die en sal hem oock niet verachten,
Ende die niet en eet, niet en verdoem
Den etenden, [die oueruloet can wachten]
Want hy nam hem aen, die ick eewich noem.
4 VVie zijt ghi die oordeelt den knecht ws naesten,
Hy staet oft valt, den Heere hy betrout:
En hy wort op ghehouden noch ten laesten,
Want God is machtich die hem staende hout.
5 D'een acht dan den eenen dach meerder blijcke
Dan d'andere, ende hy blijft daer by,
D'ander acht alle daghen hier ghelijcke,
Elck hier verseeckert int gheuoelen sy.
6 VVie den dach acht, die achte hem den Heere,
Wiet niet en doet, achten den Heere niet:
Wie eet, die eet den Heer, en gheef hem eere,
Van beyden gheeft God danck hoe het gheschiet.
7 Nyemant van ons leeft noch en sterft hem seluen,
Leuen wy, steruen wy, het is in God,
Oftmen ons siet leuen oft onder deluen,
So zijn wy dan des Heeren Zebaoth.
9 VVant hier toe so is Christus nv gestoruen,
En wederom leuendich op ghewect,
Om dat de heerschappy van hem verworuen,
Ouer de leuende en doode streckt.
| |
[Folio D1v]
| |
Den negenthienden stichtsanck wt den selfden Capittel, op de wijse vanden 14. Psalm: De dwaes die spreect in zijn, &c. 10 MEnsch waerom oordeelt ghy, veracht en schelt,
Hier uwen broeder met seer schimpich blamen,
Denct dat wy namaels sullen al te samen,
Voor Christi rechterstoel eens zijn ghestelt,
Als schrift vermelt.
11 Ick leue seyt de Heer, die eewich leeft,
Voor my buycht alle knie tot allen tijden,
En alle tonghe sal den Heer belijden,
12 Past dat ghy van thgeen dat ghy hier bedreeft
Rekenschap gheeft.
13 Laet ons den anderen cleyne noch groot,
Niet meer hier oordeelen, dan nv zijn broeder,
Maer oordeelt lieuer, het welck uwen broeder
Gheen oorsaeck gheeft tot valle oft aenstoot,
[Helpt hem in noot.]
14 Ick weet in Jesu Christo wel certeyn,
Datter als nv ter tijt en can door desen
Hier in hem seluen niet onreyns meer wesen,
| |
[Folio D2r]
| |
Dan den ghenen die sulcx hier meynt alleyn,
Dien ist onreyn.
15 In uwe spijs een broeder droefheyt doet,
Ghy hebt gheen liefd', dus wilt hem niet verdoruen,
Met v spijs daer Christus voor is ghestoruen:
16 Op dat oock voor den laster sy behoet
Ons schat en goet.
17 VVant Godes Conincrijck [in dit foreest]
En is in spijse noch in dranck gheleghen,
Maer tot rechtvaerdicheyt te zijn gheneghen,
Vred' en blijschap door den heylighen Gheest,
[Dits van het meest.]
18 VVie hier in Christo dient die is verlicht,
Aengenaem voor God, hy behaecht den menschen.
19 Soect dan tgeen dat tot vrede dient, wilt wenschen
Daer ghy hier onder een wort door ghesticht,
[Schout valsch ghedicht.]
20 Om spijs verderft Gods werc niet, ouerdinct
Dat al reyn is: maer aenstoot dient verbeten:
Want het waer beter hier gheen vleesch te eten,
21 Oft yet anders, oft datmen oock wijn drinct,
Ist saeck dat crinct.
22 Hebt ghy tgheloof by v seluen hebt dat
Voor Gode: nochtans wilt niet te seer roemen:
Salich zijnse die hen selfs niet verdoemen
In tghene dat van hen wort aen gheuat
Door tsgheloofs schat.
23 Maer die daer twijfelt, en mijt het tsgheests cracht
Is veroordeelt, dees spijs die valt hem sure,
Want hy eet niet wt den ghelooue pure:
24 En al wat wt tgheloof niet wort volbracht
Wort sond' gheacht.
|
|
