Diversche liedekens
(1574)–Matthijs de Castelein–
Auteursrechtvrij
[pagina 29]
| |
 Tsnachts tuschen twee en dryen,
Uind’ ic my laes vul rouwen,
Ter causen mijns amyen:
O Uenus vul envyen,
Twy toogdy my dees perte
Noyt vremder fantasie:
Wien clagh’ick el mijn smerte,
Dan dy schoon herte.
Een oogh can ick niet sluyten
Als ick peynse om die schoone,
Door al haer fier virtuyten
Spant zy in my die croone:
Tfy maeckt zy haer te noone
Peyns ick met scherpen sinne,
Wist zy wat ick te loone
Gaef de schoon keyserinne,
Sy droech my minne.
| |
[pagina 30]
| |
Ick peynse d’een en d’ander
Ende al van Uenus spele:
Den grooten Alexander
En peynsdes noyt soo vele,
Ten lijdt niet mijnder kele
Wies ick tsnachts moet vercheynsen,
Tsecreet van dien ick hele:
Een wijs man moet hem veynsen
Uan veel ghepeynsen.
Meest tsnachts ist dat ick duchte,
Noyt man leet sulck allende:
Thien duyst mael ick versuchte,
Jck ligghe en keere en wende:
Dan troost ick my in thende,
Tsmorghens sal ick my wreken:
Maer alst comt ter legende,
Sulcx zijn vrou Uenus treken,
Jck en can niet spreken.
Uan haer ick d’aenschijn keere
Al sie ick se voor my lyden,
Schaemte dwijnght my te seere,
Haer grootheyt moet ick myden,
Al mijn vijf sinnen stryden:
Ansie ick die schoon figure,
Jck laetse my ontglyden,
Dan vlouck ick telcker ure
Mijn auonture.
| |
[pagina 31]
| |
Princesse ick en coest niet slapen
Als ick dit liedekin wrachte,
Mijn penne moest ick rapen
En schreef aldus by nachte,
Hier af doe ick haer de clachte
Die my dus houdt in weene,
Haer buycxkin is soo sachte,
Dit is, die blomme reene
Slaept soo noode alleene.
|
|
