Diversche liedekens

[p. 3]

[RJic God hoe moet ick treuren]

RJic God hoe moet ick treuren,
Vol drux en vol doleuren
Om haer die ick gheerne zye,
Nochtans weet ick te veuren,
S’en mach my nyet gebeuren,
Nu noch te gheenen tye.
O Uenus vul envye,
Twy zydy my zo fel!
Ghy neemt my mijn amye:
Maer tis mijn schult dat weet ick wel.

[p. 4]

 

Fonteynkins laet v spruyten,

 

Bly voghelkins laet v ruyten,

 

Groen loouers wilt verdwynen,

 

Druck opend v conduyten,

 

Ghy aerde wilt ontsluyten,

 

En brijnght my ter ruwynen.

 

Och Zonne laet v schynen,

 

Drouft met my int ghequel.

 

K’en ha noyt zo veel pynen:

 

Maer tis mijn schult dat weet ick wel.

 

 

 

Sy die my hild bevanghen

 

Doet my mijn pijn verstranghen,

 

Deur haer my thertkin blaecte.

 

K’en ben nu gheen verlanghen,

 

Een ander cust die wanghen,

 

Daer ick zo zeer naer haecte:

 

Hoe dat icker naer waecte,

 

Een ander heeft mijn spel,

 

Jck bleef vul drucks, hoe ict maecte:

 

Maer tis mijn schult dat weet ick wel.

 

 

 

Princesse schoon Joncvrauwe,

 

U vreucht brijnght my in rauwe,

 

Jck ducht ick salt besteruen:

 

Laegh ick doch by v schauwe,

 

En creegh van uwen dauwe,

 

Jck zou veel vreughts verweruen:

[p. 5]

 

K’en weynschte niet meer eruen,

 

Dan uwen zoeten rel,

 

Nochtans moet icken deruen:

 

Maer tis mijn schult dat weet ick wel.