Het gulden cabinet van de edel vry schilderconst

[p. 170]

Bonaventura Peeters
Zee-schilder van Antwerpen gheboren anno 1614 ende ghestorven anno 1652.

DEn straffen Eolus, die Godt is vande winden,
Door Boreas ghehuyl, de Zee schijnt te verslinden,

En met t'grammoedich weer Neptun' ten vollen stoort

Als maer den Zeeschen Godt de donder vlaghen hoort.

Die in het fel tempeest, en diepe water golven
Doen menich kloecke Schip versincken en verdolven.

Men snijdt de Cabels los, hier worptmen Anckers uyt

Daer strijcktmen seyl en lul, men vlucht in't achter schuyt.

De visschen sijn verbaest en stooren al de baeren
De Schepen vallen om, en weten niet waer vaeren

De Zee die raest van spijt, en onghestadich slaet

Waer door dat Locht en vier meynt dat de Aerdt vergaet.

Bonaventura heeft dit alles soo gheschildert
Tempeestich, calm en stil, jae somtijts oock verwildert,

Dat jeder segghen sou, dat enckel water waer

Soo gheestich mals en los, staet elcke baer op baer.

Seer constich uytghehaelt, ghediept en soet verdreven
Soo datmen t'oordeelt oft het is het tweede leven,

Hier vlieght een witte Meeuw, daer swempt den Wallevis

Hier drijft een koopmans pack dat uyt gheworpen is:

En somtijts is sijn Const, verciert met zeesche haven
Met schip, pleyt en geley, met naeckt gheschoren slaven,

Vol dapper oorloghs volck, die naer den Zee-slach staen,

Hier rotsen wonder hoogh, daer baeren teghen slaen.

Soo dat zijn deftich werck wort over al ghepresen
Midts niemant sijns ghelijck in Const en schijnt te wesen,

Want niemants Const in Zee soo op het leven treckt

Als Peeters cloeck Pinceel, die t'leven gans ontdeckt.

[p. 171]

BONAVONTVR PEETERS. Tres bon Peinctre de Mers, Calmes, et Tempestes il sentent bien aux nauires, galeres, et Batailies sur Mer Cognoyt l'orisont, ses esloignements sont douces faict bien, les Villes et Chateaux, on voit par tout, Beaucoup de ses oeuvres, dans les Maisons des amateurs, il est natif d'Anuers, et fut ne en l'an 1614.
Ioannes Meyssen pinxit et excudet. W. Hollar fecit.