Vlissings redens lust-hof, beplant met seer schoone en bequame oeffeningen

[fol. Kk3r]

Sluys in Vlaenderen.
De Distel-Blom
Liedt Op Den Reghel. Die Godt heeft tot sijn hulp, gheen dingh hem hinder doet.

Op de Wijse: Swinters Somers even groen.

1.

Die God heeft tot sijn hulp gekregen,
Geen ding en sal hem hinder doen,
Maer ghenieten altijdt sijn zeghen,
Om te strijden stout en koen;
Ghelijck de martelaers ghepresen
Gestreen hebben tot der doot,
Om 't gheloove soo elck mach lesen,
Dat reyne liefde in haer was groot.

2.

Wanneer God de Heer den doot sendet

Tot den weder gheboren Mensch,
Gemoet hy hem half weegh en wendet
Ten Hemelwaert naer zijnen wensch,
Want sijn burgerschap en begheeren,
Is daer al eer hy selve is,
Daerom geen ding en kan hem deeren,
Want Godt sijn hulp, en troost gewis.

3.

Sijn leven is in Godt verborghen,

Dus en vreest hy Duyvel, noch Doot,
Maer stervet altijdt sonder sorghen,
Versekert van dat Hemels broodt.
Na Ierusalem stelt hy sijn ganghen,
Dat boven inde Hemel leydt,
Sijn Salighmaker te ontfanghen,
Daer groot vreught voor hem bereyt.

4.

Den Patriarch Abram vol waerde

En achte niet op sijn Lichaem,
Dat most verrotten inde aerde,
En sijn der Wormen aes bequaem,
Ghelijck den vromen Iob verheven,
Naer sijn doodt weder sou op staen,
En met den selven huyt in 't leven,
Van Christum werden aengedaen.

Prins.

Dus looft gy bruyt Gods uyt verkoren

Herboren door sijn gheest en kracht,
Hem die verdreef, 't Serpent verloren,
En niet aenhoorte 't boos gheslacht,
't Welck soeckt geduerigh u verderven,
Door practijcken en met ghewelt,
Christus die voor ons moste sterven,
Heeft Vyandts macht ter neer gevelt.

't Best is goet.

Z. Moyaert.