Veelderhande gheestelicke liedekens

C Na die wijse. Ey out grijsaert.

MIin siele looft den Heer goet
En alle vruecht wilt nv voort bringhen
Mijn herte voecht v met sinnen vroet
Om Gods lof altijt te singhen
En vergheet niet die goede dinghen
Die v door den Heer zijn gheschiet
Want hy heeft door zijn ghehinghen
U boosheyt wt ghewreuen siet.

U crancheyt gheneest hy altijt
Met bermherticheyt wilt hy v croonen
Uanden doot v leuen beurijt
U herte veruult hy niet om verschoonen
Bermhercicheyt so sal hy thoonen
Die hier zijn sonden rouwen quaet
Die onrecht lijden sal hy loonen

[p. 294]

 

Berrmhertich is hy vroech en laet.

 

 

 

Ghenadich en lanckmoedich bekent

 

Hy en straft ons niet als dwase sondaren

 

Saechtmoedich is God omnipotent

 

Sijnen thoren wil hy sparen

 

Met ons niet en handelt vaet dit verclaren

 

Naer onse sonde en boosheyt fel

 

Daer in wy allendighe eertsche scharen

 

Ghewandelt hebben door tvleesch rebel

 

 

 

So hooch den hemel perfect is fijn

 

En vast blijft bouen der eerden verheuen

 

Also strect die goetheyt Gods diuijn

 

Tot die zijn vreese hier aencleuen

 

So verre den morgen vanden auont is bleuen

 

Werpt God van ons onse sonden blint

 

Als een goet Uader zijn kint coemt beneuen

 

Ontfermt hem God en ons bemint.

 

 

 

Want hy weet hoe wy zijn ghemaect

 

Wt stof, en is ghedachtich

 

Dat de mensch als hy is ghestaect

 

Eenen cleynen tijt wat machtich

 

Hy bloeyt hier als een bloeme warachtich

 

Opt velt in corter stonden eenpaer

 

Maer als den wint daer ouer waeyt crachtich

 

Niet meer wort geuonden haer schoonheyt daer.

 

 

 

Maer des Heeren bermherticheyt minioot

 

Sal dueren inder eewicheyden

 

Ouer kints kint zijn gherechticheyt groot

 

Die God beminnen sonder afscheyden

 

Ghy Enghelen wilt Gods lof verbreyden

 

En Gods dienaers al ghemeyn

 

Sijnen name wilt eere bereyden

 

Doet oock so mijn siele wt liefden reyn.