Veelderhande gheestelicke liedekens
(1558)–Anoniem Veelderhande gheestelicke liedekens–
AuteursrechtvrijC Na de wijse. Broeders die nv gheroepen zijt.
HOort al te samen een vermaen Ga naar margenoot+
Wat wy in de Schriften vinden staen
Sal ick v gaen verclaren
Op dat ghy niemant en verdoemt
Of van gheenen wercken en beroemt
Also ons Lucas doet openbaren.
Twee zijn daer gegaen inden tempel hoort
Om te bidden spreect Christus verstatet woort
Deen was een Pharizeeus van desen
En dander was een Publicaen
Oft een sondich mensche so wy verstaen
Also wy int Euangelie lesen
Die Pharizeeus sprack dit wel beuroet
Heere ick gheef thiende van alle mijn goet
Ende heeft hem seluen ghepresen
Ick en ben ouerspeelder noch moordenar quaet
Als ander menschen opstinaet
Ende heeft op den Publicaen ghewesen
Maer lacen den sondighen Publicaen
En dorste zijn ooghen niet op slaen
Maer badt met groot verlanghen
O Heer almachtich ghebenedijt
My arme sondaer ghenadich zijt
Die is rechtueerdich wten tempel ghegangen
Hier by maken wy een cleyn vermaen
Dat niemant op zijn eyghen wercken sal staen
Aen den Pharizeeus neemt exempel
Die hem opgheblasen ginck beroemen
| |
[pagina 208]
| |
En wilde den Publicaen verdoemen
Die daer achter hem lach inden tempel.
Ten ghelt ons wet of besnijdenis puere
Dan alleenlick een nieu creatuere
als Paulus doet vermonden
Den ouden Adam moet steruen met zijn natuere
souden wy verrijsen met Christum na scriftuere
Onderdanich zijn niet meer der sonden.
Wat batet Schriftuere ghelesen fijn
Als wy daer duere niet ghebetert en sijn
Hoe derren wy dat pont aenueerden
Sy en doen gheen profijt tot gheenen termijn
Dus wil hen naken die eewighe pijn
Sy begrauen tpont inder eerden.
Iacobus die beschrijft ons bloot
Dat ghelooue sonder werck is doot
Maer het werck daer hy af wil spreken
Dat Godt van ons wil hebben ghedaen
Is dat wy weduwen en weesen bystaen
En den armen die hant toesteken.
Een scriftgeleerde inder wet wilt dit beuroen
Sprack tot Christum wat sou ick doen
Om int rijcke Gods te comen
Christus sprack hebt lief uwen Heer v God
Doet uwen naesten dits tweetste ghebot
Als v seluen het sal v vromen.
Die schriftgeleerde sprac tot Christum fijn
Ick en weet niet wie mynen naesten mach zijn
Hoort wat Christus ghinck ghewaghen
Het reysde een man van Ierico dit ghelooft
Na Ierusalem daer hy worde berooft
Onder de moordenaers half doot gheslaghen.
Tghebuerde in een corte tijt
Dat daer een Priester ende een Leuijt
Den seluen wech quamen lijden
Sy sagen hem aen maer zijn voorby ghegaen
Maer corts daer na een Samaritaen
| |
[pagina 209]
| |
Wert ontsteken met barmherticheyt.
Olie ende wijn in zijn wonden goot
Ende verbant hem zijn wonden wt liefden groot
Ende brocht hem op zijn peert sonder falen
Inder herberge, ende heeft den weerdt geseyt
Daer zijn .ij. penningen, wat ghy meer verleyt
Als ick weder come sal ick v betalen.
Christus sprac tot de schriftgeleerde na dien
Wie mach die naeste wesen van drien
Hy antwoorde Christo soot mach blijcken
Ende sprack tot Christo saen
Die barmherticheyt heeft ghedaen
Gaet doet dan dierghelijcken.
Princelicke broeders wilt verstaen
Christum by desen Samaritaen
En soect gheen ander exploten
Want hy olie der bermherticheyrt in ons goot
Als wy laghen ghewont ter doot
Heeft zijn bloet voor ons vergoten.
|
|