Veelderhande schriftuerlijcke liedekens(ca. 1552-1554)–Anoniem Veelderhande schriftuerlijcke liedekens– Auteursrechtvrij Vorige Volgende 143. Na die wijse. Ey out grijsaert. MIin siele looft den Heer goet En alle vruecht wilt nv voort bringen Mijn herte voecht v met sinnen vroet Om Gods lof altijt te singhen En vergheet niet die goede dinghen Die v duer den Heer zijn gheschiet Want hy heeft duer zijn ghehinghen U boosheyt wt ghewreuen siet. U crancheyt gheneest hy altijt Met bermherticheyt wilt hy v croonen Uanden doot v leuen beurijt [Folio R8r] [fol. R8r] U herte veruult hy niet om verschoonen Bermherticheyt soo sal hy thoonen Die hier zijn sonden rouwen quaet Die onrecht lijden sal hy loonen Bermhertich is hy vroech en laet. Ghenadich en lanckmoedich bekent Hy en straft ons niet als dwase sondaren Saechtmoedich is Godt omnipotent Sijnen thoren wil hy sparen Met ons niet en wandelt vaet dit verclaren Naer onse sonde en boosheyt fel Daer in wy allendighe eertsche scharen Ghewandelt hebben duer tvleesch rebel. Soo hooch den hemel perfeckt is fijn En vast blijft bouen der aerden verheuen Alsoo streckt die goetheyt Gods deuijn Tot die zijn vreese hier aencleuen Soo veer den morghen vanden auont is bleuen Werpt Godt van ons onse sonden blint Als een goet Uader zijn kint compt beneuen Ontfermt hem Godt en ons bemint. Want hy weet hoe wy zijn ghemaeckt Wt stof en is ghedachtich Dat de mensch als hi is ghes[l]aeckt Eenen cleijn tijt wat machtich Hy bloeyt hier als een bloeme warachtich Opt velt in corter stonden eenpaer Maer als den wint daer ouer waeyt crachtich Niet meer wort geuonden haer schoonheyt daer. Maer des Heeren bermherticheyt minioot Sal dueren inder eewicheyden Ouer kints kint zijn gherechticheyt groot Die Godt beminnen sonder afscheyden Ghy Enghelen wilt Gods lof verbreyden En Gods dienaers al ghemeijn Sijnen name wilt eere bereyden Doet oock soo mijn siele wt liefden reijn. Vorige Volgende
Auteursrechtvrij Auteursrechtvrij Auteursrechtvrij
Auteursrechtvrij
Auteursrechtvrij