Veelderhande schriftuerlijcke liedekens
(ca. 1552-1554)–Anoniem Veelderhande schriftuerlijcke liedekens–
Auteursrechtvrij96. Na die wijse. Broeders die nv gheroepen zijt. 96.HOort al te samen
een vermaen
Ga naar margenoot+
Wat wy in die schriften vinden staen
Sal ick v gaen verclaren
Op dat ghy niemant en verdoemt
Oft van gheenen wercken en beroempt
Alsoo ons Lucas doet openbaren.
Twee zijn daer gegaen inden tempel hoort
Om te bidden spreect Christus verstatet woort
Deen was een Pharizee van desen
En dander was een Publicaen
| |
[Folio L8v]
| |
Oft een sondich mensche soo wy verstaen
Alsoo wy int Euangelie lesen.
De Pharisee sprack dit wel beuroet
Heere ick gheef thiende van alle mijn goet
Ende heeft hem seluen ghepresen
Ick en ben ouerspeelder noch moordenaer quaet
Als ander menschen opstinaet
Ende heeft op den Publicaen ghewesen.
Mer lacen den sondighen Publicaen
En dorste zijn ooghen niet opslaen
Maer badt met groot verlanghen
O Heer alamchtich ghebenedijt
My arme sondaer ghenadich zijt
Die is rechtueerdich wten tempel gheganghen.
Hier by weten wi een cleijn vermaen
Dat niemant op zijn eyghen werck en sal staen
Aen Pharizeen neempt exempel
Die hem obgheblasen ghinck beroemen
En wilde den Publicaen verdoemen
Die daer achter hem lach inden tempel.
Ten ghelt ons wet of besnijdenis puere
Dan alleenlijck een nieu creatuere
Als Paulus doet vermonden
Den ouden Adam moet steruen met zijn natuere
Souden wy verrisen met Cristum na scriftuere
Onderdanich zijn niet meer der sonden.
Wat batet Scriftuere ghelesen fijn
Als wy daer duere niet ghebetert en sijn
Hoe derren wy dat pont aenueerden
Sy en doen gheen profijt tot gheenen termijn
Dus wil hem naken die eewighe pijn
Sij begrauent pont inder eerden.
Iacob die bescrijft ons bloot
Dat ghelooue sonder werck is doot
Maer het werck daer hy af wil spreken
Dat Godt van ons wil hebben ghedaen
Is dat wy weduwen en weesen bystaen
| |
[Folio M1r]
| |
En den armen die hant toesteken.
Een scrift geleerde inder wet wilt dit beuroen
Sprack tot Cristus wat sou ick doen
Om int rijcke Gods te comen
Cristus sprack hebt lief uwen Heer v God
Doet uwen naesten dits tweeste ghebot
Als v seluen het sal v vromen.
Die schriftgheleerde sprac tot Cristus fijn
Ic en weet niet wie mijnen naesten mach zijn
Hoort wat Christus ghinck ghewaghen
Het reysde een man van Ierico dit ghelooft
Na Ierusalem daer hy worde berooft
Onder de moordenaers half doot gheslaghen.
Tghebuerde in een corte tijt
Dat daer een Priester ende een Leuijt
Den seluen wech quamen lijden
Sy saghen hem aen mer zijn voorby gegaen
Maer corts daer na een Samaritaen
Wert ontsteken met barmherticheyt.
Olye ende wijn in zijn wonden goot
Ende verbant hem zijn wonden wt liefden groot
Ende brocht hem op zijn peert sonder falen
Inder herberghe ende heeft den weert gheseyt
Daer zijn .ij. penningen wat ghy meer verleyt
Als ick weder om come sal ick v betalen.
Cristus sprack de schriftgeleerde na dien
Wie mach die naeste wesen van drijen
Hy antwoorde Cristus soot mach blijcken
Ende sprack tot Christus saen
Die barmherticheyt heeft ghedaen
Gaet doet dier ghelijcken.
Princelijcke broeders wilt dit verstaen
Christus by desen Samaritaen
En soect gheen ander exploten
Want hy olie der bermherticheyt in ons goot
Als wy laghen ghewont ter doot
Heeft zijn bloet voor ons vergoten.
|
|