Den Redenrijke constliefhebbers stichtelicke recreatie
(1599)–Anoniem Redenrijker constliefhebbers stichtelicke recreatie, Der–
Auteursrechtvrij
[Folio Q2r]
| |
Liedeken.
GHy Batavischer helden,
Die u oyt manlick stelden,
Als Crijchsluyden te velden,
Om t'Vaderlandt te vrijden,
Acht niet die u beschelden,
T'onrecht als den rebelden,
V lof sal ick vermelden,
Die ghy verdient int strijden,
Teghen die als vyandt,
Met ghewapender handt,
Gheheel soecken tot schandt,
Te brenghen t'Vaderlandt
En te Tyraniseeren,
Na haer wil en begheeren,
Ouer vrouwen en Heeren,
In t'dwinghen van t'ghemoet na haer verstandt,
En in plaets van vermeeren,
En onderhoudingh sweeren,
S'landts wetten te verneeren,
Op dat daer in haer moetwil werd' gheplant.
| |
Refereyn.
ALsmen wel ondersoeckt de Romeynsche daden // cloock,
En die ons Bataviers oock hebben bedreven,
In tijden van Oorlogh, so canmen niet versmaden // oock,
Ons feyten en min lofs, als de Romeynsche gheven,
Maer moeten boven haer lof werden toegheschreven,
Door dien ons Bataviers haer daer in overtreffen veer,
T'welcken can bewijsen, met die loflick haer leuen
Voor t'Vaderland oyt waeghden, en daer in noch behalen eer,
Om t'selfde te beschermen met loflick teghenweer,
Voor uytheemsche ouerlast, gheweld, en tyrannie,
Diemen haer soeckt aen te doen, door afgodische leer,
In t'ghemoed, en slandts Privilegien te maken onvrye,
Daer ter contrarij, t'Roomsche Oorlogh streckte tot heerschappie,
Ouer anderen, dus die ons beschermen voor s'landts vileynen,
Alsulcke Btaviers overtreffen d'oude Romeynen.
| |
Liedeken.Al hadden de Romeynen,
Eertijts vroom' Capiteynen,
Daer wynich Oorloghs-greynen,
By zijn te verghelijcken,
Wie can meerder vercleynen,
| |
[Folio Q2v]
| |
Ons Helden in ons pleynen,
Wiens lof niet om verreynen,
Vermaert is in veel Rijcken,
Van ander Landen veer,
Dient men hier door begheer,
Dat haer ons Crijghs gheweer,
Sou strecken tot een Leer,
Ia selfs onse Vyanden,
Leeren noch t'haerder schanden,
In Cruyghs-daet door ons handen,
So dat hy oock ons Helden geuen eer,
En die in haren Landen,
Prijsen als den vaillianden,
Canmen oock voor verstanden,
Haer eenigh lof, eer en prijs gheuen meer?
| |
Refereyn.Loflijcker ist uyt-heemsche Tyrannie te vervremen // fijn,
En zijn recht te beschermen, so ons Bataviers doen blijcken,
Dan een ander onrechtlijck te benemen // t'zijn,
Als d'oude Romeynen deden met Oorloghsche practijcken,
Tot oprechting haerder Monarchi, ouer alle Rijcken,
Die by haer der Werlt alsdoen waren bekent,
Want een Rijck wiens vesting daer by is ye ghelijcken,
En can niet dueren lang, maer neemt dickmaels een haestigh ent,
So claerlijck is ghebleecken aen t'Roomsche regement,
En meer ander Rijcken, die oock na sulcx oyt trachten,
Wiens heerschappie so tot niet is ghemaeckt en geschent,
Dat nu in groter cleynachtinghe zijn haer geslachten,
Sulcx nadien daeghlijcx vermeren de Bataviersche machten,
Door haer rechtvaerdighe saeck, sonder yemants vercleynen,
Alsulcke Bataviers overtreffen d'oude Romeynen.
| |
Liedeken.Dit Lof by haer vercregen,
Streckt in so verre weghen,
Dat den geen die haer plegen,
In Crijghs-daet te verachten,
Tot haer nu zyn genegen,
Oock lof en eer toe dregen,
En als sy zijn verlegen,
De Bataviersche machten,
Tot haer hulp soecken aen,
Om haer recht voor te staen,
t'Welck sy niet af en slaen,
Maer seer gaerne aen gaen,
Door die na recht en reden,
Nabuyr-Landen en Steden,
| |
[Folio Q3r]
| |
Voor uyt-heemsche wreetheden,
d'Een met danders bescherming is belaen,
Och of sy also deden,
Die langh overlast leden,
Souden leuen in vreden,
En dit bloedich Oorlogh weer haest gedaen,
| |
Refereyn.Door haer rechtvaerdige saeck Godt haer so zijn segen // geeft
Dat hoe wel in heel Christenrijck haer gaet bevechten,
Den machtichsten Potentaet en men haer daer tegen // heeft,
Na aller menschen Oordeel te achten als den slechten,
Sy nochtans tegen zijn groot gewelt, met weynich crijghs-knechten,
Door manlijcke daden, so beschermen haer Vaderlant,
Dat hy niet alleen noyt yet heeft connen uytrechten,
Om haer te brengen t'onder met ghewapender hant,
Maer sy oock teghen hem t'haerder eer en t'zijner schant,
Veel loflicke Victorien hebben vercregen,
Waer door haer lof so verre streckt in Crijchs-daden vailliant,
Dat sy haer loflijck prijsen, die haer te verachten plegen,
En tot lering in Crijchs-daet haer dienen uyt verre wegen,
So dat sy oock moeten seggen tot lof onser Capiteynen,
Alsulcke Bataviers overtreffen d'oude Romeynen.
| |
Liedeken.Bouen dese Armeyen,
Die sy dickmaels bereyen,
Om andere Contreyen,
Voor overval te stercken,
Sietmen haer niet langh beyen,
(Alst past) om te bescheyen,
Noch een Heyr, t'welck sy leyen,
So wijslick in haer percken,
Dat haer Vyant verwoet,
In haer Landen en Goet,
Niet veel afbrecken doet,
Maer loflijck wert behoet,
En Godt door zijn genaden,
Haer so sterckt in haer daden,
Om de Vyant te schaden,
Dat haer Oorloghs-ghewelt dickwils doet boet,
Oock met voorsichtigh raden,
Op haer Vyant so laden,
Dat haer dick in veel graden,
Veel loflijcke Victorien ontmoet.
| |
[Folio Q3v]
| |
Refereyn.Prince. Dees Princelijcke Bataviers die voor de handen // der wreden,
Haer Vaderland beschermen en so loflick bevrijden,
Ghebruycken noch dick haer macht in ander landen // en steden,
Als sy daer toe besocht werden tot eenighen tijden,
Om die te helpen beschermen met manlick strijden,
Voor overlast en Tyranny, diemen haer soeckt te doen aen,
In alle Princen van t'Christenrijck moeten haer verblijden,
In ons loflicke crijch, als zijt te recht verstaen
Want sy belet den Spangert dat hy niet voort magh gaen,
Met zijn ghewenschte heerschappij, ouer ons nabuyren,
So dat ons vyanden al ist dat sy sulcx versmaen,
Ons Bataviers oock prijsen in haer Chrijchsmanlicke cuyren,
En door haer dick oock leeren haer crijch bestuyren,
Daerom met loflicke daden blijckt, dat niet om verreynen,
Alsulcke Bataviers overtreffen d'oude Romeynen.
| |
Liedeken.Prince.
Princelicke Batavieren,
Door dit loflick bestieren
Sietmen in veel manieren,
V Triumpheren heerlijck,
So tot t'ghemoedts vercieren,
Als in u Wets papieren,
Dat u vyansche gieren,
Die niet beheerschen deerlick,
Boven dit ghy oock zijt,
Als ghy coemt uyt den strijt,
Victorieus, altijt
Met herten seer verblijt,
Van u ghemeent ontfanghen,
Met Triumphlick verlanghen,
En meer loflicke sanghen,
Tot uwer eer en der vyanden spijt,
Oock met zuerijghe ganghen,
Ghestelt sonder verstranghen,
Daert int lest aen moet hanghen,
In t'ghedachts boeck tot u eewich jolijt.
God aller Vooght. |
|