Een nieu Guese liede boecxken
(1576)–Anoniem Een nieu Guese liede boecxken–
AuteursrechtvrijOp de wijse: Wilhelmus van Nassouwe.Met Wilhelmus van Nassouwe
Dat Edel Duytsche Bloet,
Met blijschap sonder rouwe
Laet ons Godt louen soet,
Die ons nu heeft gegeuen
Jn onsen handen reyn,
Middelburch die stadt verheuen,
Door haren noot niet cleyn.
Te spelen sy gingen aenheuen
Armuyden en Middelborgh,
Welck hem eerst soude begheuen
Te senden in groote sorgh,
Een van haer Capeteynen,
Om hulp in haren noot:
Maer quam ter stont in weynen,
Gheuanghen bleef hy bloot.
Met gheleyd sy hem brochten
| |
[Folio 77r]
| |
Te Vlissinghen binnen de stee,
Voor den Prins hy ontknochten
Zijn bootschap met grooter bee,
dat hy mochte behouwen
Sijn lijf en leuen soet,
Maer des Princen getrouwen
Brochten hem metter spoet.
Al op Zoom sy hem voerden
Tot onder Berghen claer,
Sy bewesen hem met woorden,
En metter daet oock daer,
dat niet en was voorhanden
Ontset op desen voet,
Ontrent d'Antwerpsche Landen,
Oock wert gebracht met spoet.
Te Middelburch al binnen
Js hy ghesonden daer na:
Hy seyde, Wat wildy beginnen?
Hoort toe wat ick v ra,
Als dat ghy sult aenveerden
dat v ghepresenteert is
Van d'Edel Prins van weerden
Ghenade, dat is ghewis.
Den twintichsten sy haer opgauen
Al inden tweeder maent,
Men sach al inder hauen
Of sy waer toeghebaent,
Soo dick quamen aensetten
Vele Scheepkens aldaer,
| |
[Folio 77v]
| |
Met Victaly, om te wetten
De hongerighe tanden claer.
Te Middelburch binnen de Mueren,
De Prins daer inne quam,
Met blijschap sonder treuren
De Burghers alle tsaem
Sy met hem verheuchden,
Dat sy waren beurijdt,
Wt sulcken noot in vreuchden,
Godt louende met iolijt.
Ouer al wilt aenueerden
Die Edel Prins van aert,
Barmhertich vol van weerden,
Deucht is in hem vergaert:
Dat welcke hy bewesen
Heeft aen zijnen Vyant,
dien hem Godt tot desen
Gheleuert heeft in zijn hant.
Veerthien hondert Soldaten
Van Duckdalf daer in ghesendt,
Heeft hy vry trecken laten,
Niet denckende opt elendt,
Doe sy t'Haerlem ghepresen
Haer Tyranny ghebruyckten fel
Maer hy bewees midts desen,
Sijn hert van goet opstel.
Ses van de Principalen
Gheuanghen zijn seer onsoet,
Waer onder, ten can niet falen,
Den Tyran was ongoet,
| |
[Folio 78r]
| |
De Opperste ghesonden
Int Middelburgsche pleyn,
Met een Ooghe beuonden,
Monseur Dragon alleyn.
De Gheesteloose verachte,
Veel goedts men vant by haer
De Coopluy groot van machte,
Van Antwerpen hadden daer
Veel Schats en Rijckdom legghen,
Twelck den Prins niet is te veel:
Wie cander quaet van segghen,
Van Gods schickingh gheheel.
|
|