Een nieu Guese liede boecxken

Van de ghene die Pardoen gehaelt hebben.

Een nieu Liedeken

op de wijse, van Viue le Geus.

 

 

[fol. 39v]

 

Vvaer blijft ghy nu ghy boos gheslacht,

 

Ghy die uwen Godt hebt veracht,

 

En Christum gants ghemist,

 

Weet dat ghy nu ter Werelt verwacht,

 

Tfy tfy v Pardonist.

 

 

 

Al om v schandelicken sin,

 

Hebt ghy weder gedroncken in,

 

Dat ghy hebt wtghewist,

 

So neemt dan dit voor v ghewin..

 

Tfy tfy v Pardonist.

 

 

 

Met twee roo wangen moet ghy gaen,

 

Voor alle Menschen beschaemt staen,

 

Want so seyt elck Papist:

 

V gheloof ghy verloochent saen, Tfy etc.

 

 

 

Een Geus die acht met reden waer

 

Een Pardonist voor een Verraer,

 

So is v eer verquist,

 

Om mammon draechdy schanden swaer.

 

Tfy tfy v Pardonist.

 

 

 

Dagelijcx ghy verkeeren moet,

 

Met dien die stort donnoosel bloet,

 

Daer in ghy v verfrist,

 

Dit doet ghy al om t Aertsche goet. Tfy,

 

 

 

Ghy siet daer lijden daechlijcx veel,

 

En moeten hanghen by haer keel,

 

Die ghy hebt aengehist, :

 

Wat sult ghy hebben voor v deel. Tfy etc.

 

 

 

Maer nu zijt ghy gheeert gheacht,

 

Ghelijck daer is Judas gheslacht,

[fol. 40r]

 

Dit loon is v verwist,

 

Datmen nu singt met gantscher macht,

 

Tfy tfy v Pardonist.

 

 

 

Om Mammon te vercrijghen weer,

 

Ghinckt ghy verwerpen al v eer,

 

V tijt hebt ghy vergist,

 

U eer is wech, en tgoet veel meer. Tfy

 

 

 

Wat eer sult ghy hebben int endt,

 

Als Godt den Prins int land eens sendt,

 

En t'onweer is gheslist,

 

Ende blijft voor Verraders bekent. Tfy, etc.

 

 

 

Js Mammon v so goeden vrient,

 

Hoe coemt dat ghy den Paus dan dient,

 

Die moet aen s Duyuels Rist,

 

Tgebeurt v mede eer ghyt meynt. Tfy.

 

 

 

Ghy meynt te beschermen v ghelt,

 

Maer door Gods hant het selue smelt,

 

V Bors' wert wtgheuist,

 

Om tquaet middel dat ghy voorstelt.

 

Tfy tfy v Pardonist.

 

 

 

Duckdalba sal v scheeren snel,

 

Ghelijckmen doet der Schapen vel

 

Ende vaghen v de Kist,

 

End sult noch hooren dit gerel. Tfy, etc.

 

 

 

Godt ons Prins sal geuen tijt,

 

Om te singhen t'uwen verwijt,

 

Over v valsche list:

 

Viue die zijn gheloof belijt,

 

Maer tfy een Pardonist.

Liefde vermachty al fecit. Anno. 1571.