Nieu Aemstelredams Liedboek

Op de wijse: Alst begint.

TFy v ghy moordadighe tonghen,
Verfoyt so moet ghy zijn
Ghy blameert den ouden met den jongen
Door v achterclappich fenijn,
En wilt v noch als vrienden toonen
T'is wel een vuyle valsche daet,
Beter waert by Leeuven te woonen
Dan by sulcken ghespuys seer quaet.

Samblant van liefde te bewijsen,

En te zijn met haet doorknocht
Hoe souder meerder valscheyt rijsen,
Off op aerden zijn volbrocht
Alle boosheyt gaet ghy verre te boven
Als Basiliscus siende fel
En gaet elcx naem en faem beroven,
Door uwen valschen quaden rel.

Satans ghebroet machmen v noemen,

Want ghy zijt van zijner aerdt.

[fol. 113]

 

Beelzebub is met v voort ghecomen,

 

Cerberus heeft v bewaert,

 

Invidia nijdich boos van leven,

 

V alderbeste speel-ghenoot,

 

Helpt v ghesponnen gaern weven

 

Maer het loon is d'eeuwighe doot.

 

Hydram met al haer vijftich monden

 

Ghy oock verre te boven gaet,

 

Want ongheneselijck zijn v wonden

 

Die ghy seer vergiffelijck slaet,

 

Het helsche vyer, end' bloet van draken,

 

Salpeter, Regael, des doots mortier

 

En moghen soo veel quaets niet maken

 

Als ghy hatich, nijdich dier.

 

Prince niemant hoe oudt van Jaren

 

Die heucht dus danighen tijdt,

 

Want hoe eerbaer men mach vergaren

 

Men comt op quaet becx ghecrijt,

 

Gheen soo wijs die hem can wachten,

 

Voor valsche tonghen verwoet,

 

Die altijdt daghen en nachten

 

Knaghen haer selfs vleesch en bloedt.