Hoe dat coninck Putiblas van Turckien wt seynde sijn vrouwe Torele,
met twee ruesen ende veel volcx, om Gautier van Lyons.
BInnen desen middelen tijde so ghebuerdet datter een ridder wt coninc Karels hove
te Iherusalem reysde, ende hiet Gautier van Lyons een seer edel man. Dese
Gautier quam in Turckien, ende daer wert hi ghevangen van coninck Putiblas, ende
hi hielt hem in sijn hof gaende ende keerende. Dese coninc Putiblas had een
scoon suster die noch scoon ende ionc was, ende dese Gautier conde dat
maechdeken so schone toe spreken dat hijse aent kersten geloove bracht, ende
maecte haer met kinde ende doen bracht hijse heymelic te Lyons. Dese coninck
Putiblas dit vernemende heeft raet met sijn heeren gehouden wat hi daer in doen
soude. Ten lesten so wert daer gesloten dat de coninghinne Torele met veel volcx
ende met twee ruesen daer reysen soude, ende ter wilen dat si dus stonden in
rade, so is die coninginne metten twee ruesen in die sale gecomen, ende heeft
den coninc ghevraecht waerom dat si murmureerden. Daer op die coninc antwoorde
ende seyde. O vercoren lief wi staen hier ende seggen vanden kersten die mijn
suster wech gevoert heeft, ende kersten heeft gemaect: nu hebben mijn heeren
gesloten ende geaccordeert dat wijt wreken sullen in deser manieren, als dat ghi
sult voor reysen met den twee ruesen ende met noch een deel volcx, ende ghi sult
den padt ende den wech maken, ende barnent al voor voets op tot inden gront toe:
casteelen, steden ende dorpen, ende ic sal u ooc terstont volgen met alle mijn
volc ende heyrcracht. Ende doen wert daer gesloten van hem lieden dat een
yeghelick gereet sijn soude binnen drie maenden om over te varen nae Lyons, ende
een yegelic ginck int sine: ende maecten gereesscap om dan gereet te zijn.
Doen Malegijs te Eggermont een wijl geweest hadde, so
Auteursrecht onbekend