Hollands Nachtegaeltien verryct met een nieu twede deel genaemd Hollandts en Zeeuws Nachtegaels t'samen-gezangh

[Amarilli vermoghe]

Stemme: Amarilli Miabelle.

AMarilli vermoghe
Mijn droeve klachte niet?
Waer ist medoghe
Dat voormaels hadt ghebiedt?
Mijn Goude Son die heeft wel eer ghescheenen
Hier inde vlacke Weye,
O droevich schreye,
Met u ist al verdweene.
Amarilli, Amarilli, Amarilli,
Ick moet weenen.

[p. 217]

 

2 Mymerende ghedachten,

 

Ach! sinneloose sin:

 

Klacht van mijn klachten

 

O soete Enghelin,

 

Mocht ick voor u ten Grave nederdalen,

 

De droeve doodt aenvaerden,

 

Om Amaril te halen,

 

Amarilli, Amarilli, Amaril,

 

'k Ben vol qualen.

 

 

 

3 Sla ick 't Oogh na de Beke

 

Soo beeld ick mijn staegh voor,

 

Dat ick het spreke

 

Mijns Amarilli hoor:

 

O leeftse noch mijn soetste Ziels beminden:

 

Is dese Nimph ghevloode?

 

Weest mijn klachts boode,

 

Kan gheen bequamer vinden,

 

Amarilli, Amarilli, Amaril,

 

Als de Winden.

 

 

 

4 Amarilli dit kerme

[p. 218]

 

't Gheen u de Bode brenght,

 

Sal u erberme

 

'k Meen ghy noch om my denckt:

 

Maer te vergheefs sal u de post na-jaghe

 

Dan het zijn viesevase,

 

Wat mach ick rase?

 

Sach ick haer baer niet draghe

 

Amarilli, Amarilli, Amaril,

 

Ick moet klaghe.

 

 

 

5 Aerdtsche vreuchde wilt vluchte,

 

Of weest een weynich stil:

 

Hoor ick het suchten

 

Mijns lieve Amaril,

 

Wie dat de doodt so vroech niet toe en hoorde

 

Om 't lieve Beeldt te plette,

 

Doodt wilt niet lette,

 

Komt met u strenghe koorde,

 

Amarilli, Amarilli, Amaril,

 

'k Laet mijn moorde.

A.V. Bergh.