Die Hexe
(1897)–Anoniem Hexe, Die–
Auteursrecht onbekend
[Folio 230ra]
| |
Die Hexe.
| |
Machtelt.
Ach goede liede, hoe salic varen!
Die wolle es beter dant garen;
Het gheet met mi al achterwaert!
Hoe comet dat al dus qualijc vaert?
5[regelnummer]
In weet, wat mi es ghesciet;
En daet die lede duvel niet,
In soude al dus niet mogen dolen.
Luutgaert.
Nu segt mi, Machtelt, onverholen:
Waer omme stadi dus en claecht?
10[regelnummer]
Ic come ende hebbe den vos verjaecht,
Die mi twee hoender heeft verbeten.
Hoe sidi al dus hier gheseten?
Op alle trouwe, berechtes mi.
Machtelt.
Luutgaert, daer es groot redene bi,
15[regelnummer]
Want dat ic niet en rase, dats wonder.
Die avonture hout mi soe tonder,
Want wat ic pine nacht ende dach,
Te ghenen profite ic comen en mach;
Het doet emmer toverie.
Luutgaert.
| |
[Folio 230rb]
| |
20[regelnummer]
Machtelt, bider maghet
Marie!
Ic wene ghi niet en hebt geloghen.
Met toverie benic bedroghen;
Alsoe, Machtelt, maecht u staen.
Mine coe es haer melc ontgaen,
25[regelnummer]
Hen es anders niet dan water.
En daet niet die helsche cater
Ofte die lede perlesijn,
Hen soude al dus niet moghen sijn.
Maer wel vermoedic mi op ene;
30[regelnummer]
Want ghisteren daer ic quam allene
Op ene vierweechstede, buten weghe
Vandic sittene ene oude teve
Ende hadde botere voer haer staende;
Ic wane dat si den duvel maende,
35[regelnummer]
Die daer die botere comen dede.
Machtelt.
Luutgaert, bi gods moghenthede!
Ic moet u segghen onverholen,
Die boter hadse mi ghestolen.
Met quaden messen moet mense ontliven!
40[regelnummer]
In coste in eenre maent ghecrighen
Van mijnre blare coe eneghe botere;
Wat ic clutse of wat ic clotere,
Het es al te male om niet.
Op alle trouwe, kindise niet
45[regelnummer]
Die stronthoere? woense hier bi?
Luutgaert.
Jase, Machtelt, gheloves mi.
Si es van Corterike gheboren,
Ende heeft haer ene ore verloren
Van quader dieften, dat es waer,
50[regelnummer]
Ende oec wasse cort daer naer
Uut Ghint ghebannen op den pit.
Met meneghen dinc es si besmit,
Daer si met pleghet om te gane.
Kindise niet? hets Juliane,
55[regelnummer]
Die ghinder woent op den hoec.
Si heeft een toveren boec,
Daer si met te toveren pleghet.
Hets jammer, dat si niet en leghet
In enen put onder die galghe
| |
[Folio 230va]
| |
60[regelnummer]
Vaste ghedolven metten
balghe!
Si vercoept nu oesters bier.
Machtelt.
Luutgaert, wat sitten wi dan hier?
Ic kinse weel, eest Juliane?
Laet ons beiden bestaen te gane
65[regelnummer]
Ende enen poet biers te gader meten;
Wi selen al die waerheit weten
Van desen saken groet ende smal.
Luutgaert.
Gherne, Machtelt, groet ongheval
Moet haer gheven sente Bride.
70[regelnummer]
Want ic menech quaet ghetide
Hebbe leden dat si mi brachte ane.
Machtelt.
Segt, vrouwe ver Juliane,
Hebdi enich oesters bier?
Juliane.
Jaic, ghi vrouwen, wenen comdi hier
75[regelnummer]
Al dus te gadere onder u lieden?
Het moet emmer yet bedieden;
Over mi moghdi wesen coene.
Luutgaert.
Juliane, wi hebben hier te doene;
Wi droncken gerne van uwen biere.
80[regelnummer]
Ic bits u, set ons biden viere.
Haelt ons bier, wi selent betalen.
Juliane.
In vragher niet na, ic gaets u halen.
Altoes ghebiet te mi weert!
Machtelt.
| |
[Folio 230vb]
| |
Vrouwe Juliane, ons beiden deert,
85[regelnummer]
Ende gherne souden wijs u vraghen,
Maer qualijc dorren wijs ghewaghen,
Wi weten wel dat ghijs sijt vroet;
Gherne gheraecten wij ane goet,
Coster wi wel comen ane.
90[regelnummer]
Ons es ghegheven te verstane,
Waert dat sake, dat ghi wout,
Dat ghi ons wel hulpen sout,
Ende hier omme siwi tote u comen.
Juliane.
Wat, gebuerinnen! mochtic u iet vromen
95[regelnummer]
Met mire const, met minen rade,
Ic ben die ghene, diet gerne dade,
Want u welvaren ware mi lief.
Haddi die hant van enen dief
Daer neghen messen op waren ghedaen
100[regelnummer]
Het soude u altoes voerwaert gaen,
Soe waer ghi die hant ane sloecht.
Luutgaert.
Ay hoere, dat ghi ons dies gewoecht,
Dies moetti hebben vele quader jaren.
Nu weten wi wel al oppenbaren,
105[regelnummer]
Wat ghi met ons hebt ghedreven.
Ghi selt ons moeten wedergheven,
Dat ghi ons qualijc hebt ghestolen,
Ofte wi selen u oghen uutpolen
Ende met desen pot soe gheraken,
110[regelnummer]
U toverie sal nu uutcraken.
Hier vechten si.
Juliane.
Ay ghi vrouwen, slaet met ghemake!
.c.x. vs.
|
|