Handschrift Berlijn mgo 185
(15de eeuw)–Anoniem Handschrift Berlijn mgo 185–
Auteursrechtvrijdit is die wedersanck [95]1 Och edelle mensche mynnet dinen god
bauen alle creatueren
want wattu anders genoechte suekeste
ten mach niet lange dueren
2 Och mensche dencket aen dyn edelheit
ende leuet doch nae der redene
Want sal die ziele hoeren willen vercrygen
dat vleys moet syn vertreden
3 Nv keer din ogen al in dat oest
al daer die sonne opdrynget
ende legt alle uwen vlyt daer aen
ende hoert watmen daer synget
4 Die discantieren die daer syn
van sueter melodien
wanneer
| |
[pagina 96]
| |
di hier die tyt verdriet
soe salstu der wert lyden
5 Die claerheit die heer Jhesus schencket
die is soe suete te dryncken
als ons dit vleysche hier moeyen wil
soe laet ons daer op dencken
6 Ende die nv hier den rype ontsiet
op hem sal vallen die colde snee
wie comet al inder hellen gloet
die roepen soe lude O wy ende o wee
7 Die vaderlicke roede laet ons ontfaen
op dat wy vlyen den hamerslach
ende dencke wi op dat godtelicke heer
sy hadden soe mennygen droeuighen dach
| |
[pagina 97]
| |
8 Die gade wil sien die moet hem keren
van alle creatueren
ende hi moet alle dingen vlien
die niet en moegen dueren
9 Laet ons nv setten in onsen moet
dat wi ons willen liden
Heer Jhesus is soe trouwen vret
hi wil ons helpen stryden
10 Dat godtelike aensicht is soe claer
als wi dat beschouwen
hadde wy geleden eer dusent jaer
ten solde ons dan niet rouwen
11 Och edelle herte keer di van hier
Want du en vyndeste hier genen troest
ende sette dyn hape alleen in gade
soe werdestu
| |
[pagina 98]
| |
altemael verloest
12 Die synlicheit moet ommer steruen
och dat doet mennygen herten wee
mer comet die mynne mit hoere vlammen
sy brantet altemael ontwee
13 Och guede Jhs staet on by
al mit geheelre trouwen
in creatueren en vynt mens niet
dat machmen nv wal schouwen
14 Ick wil di seggen soe alst is
dat salstu holden alre gewys
soekestu vrede in deser tyt
altehans werdestu des quyt
15 Daerom soe keren wy ons van hier
ende sueken dat enich een
daer laet ons mitten ogen
| |
[pagina 99]
| |
staeren
ende mitten herten al doer varen
16 Die laten wil des hem genoeget
syn loen sal wesen alsoe groet
ende nyemant en wese daer in verslagen
die mynne is sterker dan die doet
Amen
|
|